شہباز شریف کی مسئلہ فلسطین پر اردوان کی دل کو چھو لینے والی تقریر پر مبارکباد

نیو یارک: وزیراعظم شہباز شریف نے ترک صدر رجب طیب اردوان سے ملاقات کی جس میں مختلف امور پر تبادلہ خیال کیا گیا۔

تفصیلات کے مطابق وزیر اعظم شہباز شریف نے کہا کہ اقوام متحدہ میں فلسطین پر ترک صدر کی تقریر دل کو چھو لینے والی تھی۔ صدر اردوان نے جس طرح مسئلہ فلسطین بیان کیا اس نے ہال میں موجود ہر شخص کے دلوں کو چھو لیا۔ انہوں نے مزید کہا کہ میں ترک صدر کو مبارکباد پیش کرتا ہوں۔

شہباز شریف نے کہا کہ ملاقات میں پاکستان اور ترکی کے درمیان برادرانہ تعلقات کے تمام پہلوؤں پر تبادلہ خیال کیا گیا۔ صدر اردوان نے کہا کہ وہ جلد ہی پاکستان کا دورہ کریں گے۔

شہباز شریف نے کہا کہ آج آئی ایم ایف بورڈ کا اجلاس ہے اور ہم نے ان کی وہ تمام شرائط پوری کی ہیں جو بہت سخت تھیں۔ ان کا کہنا تھا کہ آئی ایم ایف کی کچھ شرائط چین سے متعلق تھیں اور ہمیشہ کی طرح بیجنگ نے ماضی کی طرح ہمارا ہاتھ تھام کر تعاون کیا۔

انہوں نے مزید کہا کہ وہ چین، سعودی عرب اور متحدہ عرب امارات کی قیادت کے شکر گزار ہیں کیونکہ ان کی حمایت کے بغیر یہ ممکن نہیں تھا۔

وزیراعظم نے کہا کہ حکومت اور اداروں نے اجتماعی کوششوں سے معاشی چیلنجز کو قبول کیا ہے اور دن رات محنت سے معاشی اشاریے بتدریج بہتر ہو رہے ہیں۔