پاکستان اور سری لنکا کے درمیان آخری ٹی ٹوئٹی پنک ڈے سے منسوب

لاہور: پاکستان اور سری لنکا کے درمیان سیریز کا تیسرا اور آخری ٹی ٹوئنٹی میچ آج قذافی اسٹیڈیم لاہور میں کھیلا جائے گا۔ میچ کو پنک ڈے سے منسوب کردیا گیا۔

پاکستان اور سری لنکا کے درمیان سیریز کا تیسرا اور آخری ٹی ٹوئنٹی میچ آج قذافی اسٹیڈیم لاہور میں کھیلا جائے گا۔ میچ شام ساڑھے چھ بجے شروع ہوگا۔

پی سی بی نے آخری ٹی ٹوئنٹی میچ کو پنک ڈے سے منسوب کرنے کا اعلان کردیا ہے۔

یہ بھی پڑھیں : ڈین جونز کی مصباح الحق کے چیف سیلیکٹر اور کوچ کا عہدہ رکھنے کی مخالفت

صدر مملکت ڈاکٹر عارف علوی اور چیئرمین پی سی بی میچ سے قبل کینسر کی آگاہی کے حوالے سے منعقدہ تقریب میں شرکت کریں گے۔ صدر پاکستان دونوں ٹیموں کے کپتانوں کو پنک ربن پہنائیں گے۔ میچ کے تمام کھلاڑی اور آفیشلز بھی مرض کی آگاہی کے لیے پنک ربن پہنیں گے۔

قذافی اسٹیڈیم میں موجود شائقین کرکٹ کو ربن اور 750 کرکٹ فینز میں پنک شرٹس بھی تقسیم کی جائیں گی۔ کرکٹ بورڈ نے شائقین کرکٹ کوپنک شرٹ پہن کر اسٹیڈیم آنے کی درخواست بھی کی ہے۔

تاریخی قذافی اسٹیڈیم آج کے روز گلابی رنگ سے رنگا جائے گا۔
پاکستان کرکٹ بورڈ نے پاکستان اور سری لنکا کے درمیان تیسرے ٹی ٹونٹی میچ کو بریسٹ کینسر کی آگاہی سے منسوب کرنے کا فیصلہ کیا ہے۔#ُPAKvSL #PINKtober https://t.co/QvVxZ5y85T

— Pakistan Cricket (@TheRealPCB) October 9, 2019

واضح رہے کہ سری لنکا کو پاکستان کے خلاف تین میچز کی سیریز میں دو صفر کی فیصلہ کن برتری حاصل ہے۔ سری لنکا نے پہلے دونوں میچز میں پاکستان کو شکست دی تھی۔ سرفراز الیون کو آئی لینڈرز کے خلاف سیریز میں کلین سوئپ سے بچنے کیلئے یہ میچ لازمی جیتنا ہوگا۔

دونوں ٹیموں نے گزشتہ روز کسی پریکٹس سیشن میں حصہ نہیں لیا تھا۔

خیال رہے کہ عمر اکمل سری لنکا کے خلاف دوسرے ٹی 20 میں بھی صفر پر آؤٹ ہوئے۔ ان کے کیریئر میں صفر پر آؤٹ ہونے کا یہ دسواں موقع تھا۔

عمر اکمل نے سب سے زیادہ دس مرتبہ صفر پر آؤٹ ہو کر سری لنکا کے تلکرتنے دلشان کا صفر پر آؤٹ ہونے کا عالمی ریکارڈ برابر کردیا ہے۔ عمر اکمل دوسرے میچ میں ونندو ہسارانگا کی پہلی ہی گیند پر ایل بی ڈبلیو ہوگئے تھے۔