اربعین کے ویزہ کے اجراء کا مسئلہ خوش اسلوبی سے طے پا گیا : وزیر خارجہ

اسلام آباد: وزیر خارجہ نے کہا ہے کہ اربعین کے ویزہ کے اجراء کا مسئلہ خوش اسلوبی سے طے پا گیا، زائرین کو ویزے جاری کردیئے جائیں گے۔

وزیر خارجہ شاہ محمود قریشی نے اہم ویڈیو پیغام جاری کیا ہے، جس میں ان کا کہنا ہے کہ میری ابھی عراق کے وزیر خارجہ محمد علی حاکم سے ٹیلیفون پر بات ہوئی ہے۔ مجھے یہ بتاتے ہوئے مسرت محسوس ہو رہی ہے کہ اربعین کے ویزہ کے اجراء کا مسئلہ خوش اسلوبی سے طے پا گیا ہے۔

انہوں نے کہا کہ پچھلی مرتبہ بھی یہ مسئلہ سامنے آیا تھا جسے بروقت رابطہ کر کے حل کر لیا گیا، اس مرتبہ بھی وہی مسئلہ درپیش ہوا۔ میں عراقی حکومت اور ان کی وزارت خارجہ کا شکرگزار ہوں کہ انہوں نے ہماری درخواست کو قبول کیا۔

ان کا کہنا تھا کہ وہ لوگ جو اربعین کے لیے عراق جانے کے خواہشمند ہیں اور ویزا کیلئے درخواستیں دے رکھی ہیں، ان کو ویزے جاری کر دیئے جائیں گے۔

یہ بھی پڑھیں : پاکستانی زائرین کو عراقی ویزے میں مشکلات، وزیر خارجہ عراقی ہم منصب سے رابطہ کریں گے

وزیر خارجہ نے کہا کہ یہ بھی فیصلہ ہوا ہے کہ اس سلسلے میں جو اضافی سٹاف درکار ہو گا وہ بھی عراقی سفارت خانے سے بھیجا جائے گا تاکہ ویزہ کے امور بروقت تکمیل پا سکیں۔

شاہ محمود قریشی نے کہا کہ ہم نے یہ بھی طے کیا ہے کہ اس مسئلے کے مستقبل حل کیلئے کوئی باہمی متفقہ لائحہ عمل ترتیب دیا جائے، جیسا کہ عراق اور خلیجی ممالک کے مابین ہے تاکہ آئندہ یہ مسائل پیش نہ آئیں اور ویزہ کے حصول میں دشواری کا سامنا نہ کرنا پڑے۔

انہوں نے کہا کہ میں نے انہیں دورہ ء پاکستان کی دعوت بھی دی ہے جو انہوں نے قبول کی۔ عراقی حکومت کی خواہش ہے کہ اہل تشیع کے ساتھ ساتھ اہل سنت کے زائرین کی عراق آمد کے خواہاں ہیں، انہیں خوش آمدید کہیں گے۔ ہمیں خوشی ہے کہ یہ مسئلہ خوش اسلوبی سے طے پا گیا ہے۔