قاسم سوری کے خلاف الیکشن ٹریبونل کا فیصلہ معطل، ڈپٹی اسپیکر کا عہدہ بحال

اسلام آباد: سپریم کورٹ نے قاسم سوری کے خلاف الیکشن ٹریبونل کے فیصلے کو معطل کردیا ہے، درخواست پر حتمی فیصلہ ہونے تک قاسم سوری کی رکنیت بحال ہو گئی۔

جسٹس عمر عطا بندیال کی سربراہی میں سپریم کورٹ کے 3 رکنی بینچ نے الیکشن ٹریبونل کے فیصلے کے خلاف اپیل کو سماعت کے لیے منظور کرلیا۔

عدالت عظمیٰ میں قاسم سوری کی جانب سے الیکشن ٹریبونل کے انتخابات میں کامیابی کو کالعدم قرار دینے کے فیصلے کے خلاف اپیل ایڈووکیٹ نعیم بخاری نے دائر کی تھی۔

درخواست میں موقف اختیار کیا گیا تھا کہ الیکشن ٹریبونل نے شواہد کا جائزہ نہیں لیا، انتخابی عمل میں بے ضابطگیاں میرے موکل سے منسوب نہیں ہوسکتیں۔

یہ بھی پڑھیں : مولانا فضل الرحمان مذہب کو بیچ رہے ہیں : شبلی فراز

درخواست گزار نے عدالت سے استدعا کی تھی کہ الیکشن ٹریبونل کے فیصلے کو کالعدم قرار دیا جائے۔

جس پر عدالت نے فریقین کو نوٹسز جاری کرتے ہوئے الیکشن کمیشن کو مذکورہ نشست پر ضمنی انتخابات کا شیڈول جاری کرنے سے روک دیا۔

خیال رہے کہ 27 ستمبر کو الیکشن ٹریبونل نے قومی اسمبلی کے حلقہ این اے 265 سے کامیاب پاکستان تحریک انصاف (پی ٹی آئی) کے رہنما اور ڈپٹی اسپیکر قومی اسمبلی کی کامیابی کو کالعدم قرار دیا تھا۔

قاسم سوری کی انتخابی کامیابی کو نوابزادہ لشکری رئیسانی نے چیلنج کیا تھا اور 2018 انتخابات میں مبینہ دھاندلی کے خلاف درخواست دائر کی تھی۔

واضح رہے کہ لشکری رئیسانی ان 5 امیدواروں میں سے ایک تھے جنہوں نے این اے 265 سے انتخابات میں حصہ لیا تھا لیکن انہیں قاسم سوری سے شکست کا سامنا کرنا پڑا تھا۔

الیکشن ٹریبونل نے این اے 265 کوئٹہ ٹو سے قاسم سوری کی کامیابی کا نوٹیفکیشن کالعدم قرار دیا تھا اور حلقے میں دوبارہ انتخابات کا حکم بھی جاری کردیا تھا۔

علاوہ ازیں درخواست گزار کے وکیل ایڈووکیٹ محمد ریاض نے کہا تھا کہ ٹریبونل کے فیصلے کے بعد قاسم سوری رکن قومی اسمبلی نہیں رہے۔

واضح رہے کہ قاسم سوری نے عام انتخابات 2018 میں بلوچستان میں قومی اسمبلی کے حلقہ 265 کوئٹہ 2 سے کامیابی حاصل کی تھی۔

بعد ازاں وہ 15 اگست 2018 کو 183 ووٹز حاصل کرکے قومی اسمبلی کے ڈپٹی اسپیکر منتخب ہوئے تھے۔