ویڈیو اسکینڈل کیس : نواز شریف کی اپیل پر نیب سے جواب طلب

اسلام آباد: نواز شریف نے ارشد ملک ویڈیو اسکینڈل کیس میں سپریم کورٹ کے فیصلے کے خلاف نظرثانی درخواست دائر کردی ہے، ویڈیو اسکینڈل میں فیصلے سے ہمارا حق متاثر ہوا ہے۔

سابق وزیر اعظم اور مسلم لیگ (ن) کے تاحیات قائد نواز شریف نے احتساب عدالت کے سابق جج ارشد ملک ویڈیو اسکینڈل میں سپریم کورٹ کے فیصلے کے خلاف نظر ثانی اپیل دائر کردی ہے۔

سماعت کے موقع پر جسٹس محسن اختر کیانی نے ریمارکس دیئے کہ دیکھنا ہو گا کہ عدالتی فیصلہ آنے کے بعد کے ایونٹس کا پہلے سنائے گئے فیصلے پر کیا اثر ہو گا؟

یہ بھی پڑھیں : جج کا طرز عمل ادارے کے لیے بدنما داغ کی طرح ہے، سپریم کورٹ کا جج ویڈیو اسکینڈل پر فیصلہ

انہوں نے نواز شریف کے وکیل خواجہ حارث سے استفسار کیا کہ آپ بتائیں کہ کیا ہم میرٹ پر اپیل کو پہلے سنیں یا اس معاملے کو بھی ساتھ ہی دیکھا جائے؟

نواز شریف کے وکیل خواجہ حارث نے کہا کہ عدالت نے فیئر ٹرائل کا معاملہ دیکھنا ہے کہ کیا فیئر ٹرائل کا حق پورا ہوا یا نہیں۔ عدالت نے پہلے اس معاملے کا تعلق دیکھنا اور پھر حقائق کو پرکھنا ہے۔  

عدالت نے نواز شریف کی متفرق درخواست پر نیب کو نوٹس جاری کرتے ہوئے تحریری جواب طلب کرلیا ہے۔

درخواست میں جج ارشد ملک اور دیگر کو فریق بناتے ہوئے کہا گیا کہ ہمیں نوٹس کیے بغیر اور مؤقف سنے بغیر سپریم کورٹ نے ویڈیو کیس کا فیصلہ دیا اور معاملے کے حدود طے کردیئے۔

نواز شریف نے درخواست میں مؤقف اختیار کیا ہے کہ کہ ویڈیو اسکینڈل کے معاملے پر ہمارا مؤقف بھی سنا جائے، سپریم کورٹ نے جو ویڈیو اسکینڈل میں فیصلہ دیا اُس سے ہمارا حق متاثر ہوا، انصاف کے تقاضے پورے کرنے کے لیے ہمارا موقف سنا جائے اور عدالت اپنے فیصلے پر نظر ثانی کرے۔

واضح رہے کہ سپریم کورٹ نے احتساب عدالت کے جج ارشد ملک ویڈیو اسکینڈل کیس کا فیصلہ سناتے ہوئے کہا تھا کہ  اسلام آباد ہائی کورٹ کو اختیار ہے کہ وہ اس ویڈیو کے منظرِ عام آنے کے بعد جج ارشد ملک کی طرف سے سابق وزیر اعظم میاں نواز شریف کو دی جانے والی سزا کا از سر نو جائزہ لے۔