مولانا فضل الرحمان مذہب کو بیچ رہے ہیں : شبلی فراز

اسلام آباد: شبلی فراز نے کہا ہے کہ مولانا فضل الرحمان مذہب کو بیچ رہے ہیں، ہم نے دھرنے میں مذہب کو استعمال نہیں کیا تھا، عمران خان نے اقوام متحدہ میں جو مؤقف اختیار کیا وہ دس مولانا بھی نہیں کر سکتے ہیں۔

سینٹ کے قائد ایوان سینیٹر شبلی فراز سابق ڈپٹی اسپیکر قومی اسمبلی قاسم سوری کے ہمراہ سپریم کورٹ آف پاکستان پہنچنے پر  ذرائع ابلاغ سے بات چیت کرتے ہوئے کہا کہ امیر جمعیت علماء اسلام (ف) مولانا فضل الرحمان نے ناموس رسالتﷺ کے نام پر چندہ اکٹھا کیا ہے، وہ مدرسہ اصلاحات نہیں کرانا چاہتے ہیں۔

یہ بھی پڑھیں : قاسم سوری نے الیکشن ٹربیونل فیصلے کیخلاف سپریم کورٹ سے رجوع کرلیا

سینٹ میں قائد ایوان سینیٹر شبلی فراز نے الزام عائد کیا ہے کہ مولانا فضل الرحمان مذہب کو بیچ رہے ہیں اور مذہب کو سیاست میں استعمال کررہے ہیں۔ انہوں نے دعویٰ کیا کہ ہم نے اپنے دھرنے میں مذہب کو استعمال نہیں کیا تھا۔

پاکستان تحریک انصاف سے تعلق رکھنے والے سینیٹر شبلی فراز نے کہا کہ ناموس رسالتﷺ  پر وزیراعظم عمران خان نے جو مؤقف اختیار کیا وہ دس مولانا بھی نہیں کر سکتے ہیں۔

ایک سوال پر انہوں نے کہا کہ ہمیں نظام میں موجود غلطیوں کا ازالہ کرنا چاہیے۔

یہ بھی پڑھیں : صادق سنجرانی کو ہٹانا، جمہوریت کے خلاف سازش ہے : شبلی فراز

سینیٹ میں قائد ایوان سینیٹر شبلی فراز نے زور دے کر کہا کہ الیکشن کمیشن آف پاکستان اور نادرا کو موجود تیکنیکی خامیاں دور کرنی چاہئیں۔

جے یو آئی (ف) کے امیر مولانا فضل الرحمان نے 27 اکتوبر کو آزادی مارچ کا اعلان کر رکھا ہے جس میں شمولیت کے لیے وہ پاکستان مسلم لیگ (ن) ، پاکستان پیپلزپارٹی اور عوامی نیشنل پارٹی سمیت دیگر سیاسی و مذہبی جماعتوں سے رابطے میں ہیں۔

مولانا فضل الرحمان کا دعویٰ ہے کہ ان کے احتجاج سے حکومت ہل جائے گی۔