مولانا فضل الرحمن مدارس کے بچوں کو سیاست کیلئے استعمال کرتے ہیں : فواد چوہدری

اسلام آباد: فواد چوہدری نے کہا ہے کہ مدارس کے بچوں کو جہاد کے نام پر ملاؤں اور سیاست میں قربانی کا بکرا بنایا گیا۔ مولانا فضل الرحمنٰ کا مقصد اپنی ذاتی سیاسی حیثیت کی بحالی ہے۔

وفاقی وزیر سائنس و ٹیکنالوجی فواد چوہدری نے سماجی میڈیا پر اپنے بیان میں مولانا فضل الرحمنٰ کے آزادی مارچ کو تنقید کا نشانہ بناتے ہوئے کہا ہے کہ مدارس کے بچوں کو چارے کے طور پر استعمال کرنے کی تاریخ بہت پرانی ہے، بچوں کو جہاد کے نام پر ملاؤں نے استعمال کیا، پھر سیاست میں ان غریب بچوں کو قربانی کا بکرا بنایا گیا۔

یہ بھی پڑھیں : مولانا فضل الرحمٰن نے ملک میں نئے انتخابات کا مطالبہ کردیا

انہوں نے کہا کہ فضل الرحمنٰ، تحریک لبیک وغیرہ ایسی سیاسی جماعتیں ہیں، جن کے لیڈر مدارس کے بچوں کو اپنی سیاست کیلئے استعمال کرتے ہیں۔

فواد چوہدری نے کہا کہ اب فضل الرحمنٰ کی تحریک کے دو بڑے مقاصد ہیں ایک تو اپنی ذاتی سیاسی حیثیت کی بحالی دوسرا مدرسہ اصلاحات کو روکنا ہے۔

ان کا کہنا تھا کہ ایک دفعہ مدارس ہاتھ سے نکل گئے اور یہ بچے غلامی کی زندگی سے شعور کے نظام میں داخل ہوگئے تو ان کی دکانیں مستقل طور پر بند ہو جائیں گی۔