افغان طالبان کا بارہ رکنی وفد دفتر خارجہ پہنچ گیا، افغان امن مذاکرات کا آغاز

اسلام آباد: ملا عبدالغنی برادر کی قیادت میں افغان طالبان کا بارہ رکنی وفد دفتر خارجہ پہنچ گیا۔ پاکستانی وفد کی نمائندگی وزیر خارجہ مخدوم شاہ محمود قریشی کر رہے ہیں۔

قطر کے دارالحکومت دوحہ میں طالبان کے سیاسی دفتر کے اعلیٰ سطحی وفد کی ملا عبدالغنی برادر کی سربراہی میں وزارت خارجہ آمد ہوئی ہے۔ پاکستانی وفد کی نمائندگی وزیر خارجہ مخدوم مخدوم شاہ محمود قریشی کر رہے ہیں۔

وفد کی وزیر خارجہ مخدوم شاہ محمود قریشی سے ملاقات ہوئی۔ وزیر خارجہ نے وفد کو وزارت خارجہ میں خوش آمدید کہا۔

دوران ملاقات خطے کی صورتحال، افغان امن عمل سمیت باہمی دلچسپی کے امور پر تبادلہ ء خیال کیا گیا۔

یہ بھی پڑھیں : افغانستان صدارتی الیکشن میں صرف بیس فیصد ووٹرز کی شرکت

اس موقع پر وزیر خارجہ شاہ محمود قریشی نے کہا کہ پاکستان اور افغانستان کے مابین دو طرفہ برادرانہ تعلقات، مذہبی ثقافتی اور تاریخی بنیادوں پر استوار ہیں۔ گزشتہ چالیس برس سے افغانستان میں عدم استحکام کا خمیازہ دونوں ممالک یکساں طور پر بھگت رہے ہیں۔

انہوں نے کہا کہ پاکستان، صدق دل سے سمجھتا ہے کہ جنگ کسی مسئلے کا حل نہیں ہے افغانستان میں قیام امن کیلئے "مذاکرات” ہی مثبت اور واحد راستہ ہے۔ ہمیں خوشی ہے کہ آج دنیا، افغانستان کے حوالے سے ہمارے مؤقف کی تائید کر رہی ہے۔

وزیر خارجہ کا کہنا تھا کہ پاکستان خوش دلی کے ساتھ گزشتہ چار دہائیوں سے لاکھوں افغان مہاجرین بھائیوں کی میزبانی کرتا چلا آ رہا ہے۔ پاکستان نے افغان امن عمل میں مشترکہ ذمہ داری کے تحت نہایت ایمانداری سے مصالحانہ کردار ادا کیا ہے۔

شاہ محمود قریشی نے کہا کہ پر امن افغانستان پورے خطے کے امن و استحکام کیلئے ناگزیر ہے۔ انہوں نے خواہش کا اظہار کیا کہ فریقین مذاکرات کی جلد بحالی کی طرف راغب ہوں تاکہ دیرپا، اور پائیدار امن و استحکام کی راہ ہموار ہو سکے۔

افغان طالبان کے اعلیٰ سطحی وفد نے افغان امن عمل میں پاکستان کے مصالحانہ کردار کی تعریف کی۔ فریقین کا مذاکرات کی جلد بحالی کی ضرورت پر اتفاق کیا۔

وزیر خارجہ نے واضح کیا کہ پاکستان افغان امن عمل کو کامیاب بنانے کیلئے اپنا مصالحانہ کردار صدق دل سے ادا کرتا رہے گا۔

وفود کے درمیان مذاکرات شروع ہو گئے ہیں۔