دو سیاسی جماعتیں مولانا کو ذاتی مفادات کی بھینٹ چڑھانا چاہتی ہیں : فردوس عاشق

اسلام آباد: وزیر اعظم کی معاون خصوصی فردوس عاشق اعوان نے کہا ہے کہ مولانا صاحب کو دو سیاسی جماعتیں ذاتی مفادات کی بھینٹ چڑھانا چاہتی ہیں، اپنے سیاسی مفاد میں صرف مولانا کا کندھا استعمال کرنا چاہتے ہیں۔

وزیر اعظم کی معاون خصوصی برائے اطلاعات و نشریات ڈاکٹر فردوس عاشق اعوان نے سماجی میڈیا پر اپنے پیغام میں آزادی مارچ کے حوالے سے مولانا فضل الرحمن کو مخاطب کرتے ہوئے کہا کہ مولانا صاحب! دو سیاسی جماعتیں آپ کو اپنے ذاتی مفادات کی بھینٹ چڑھانا چاہتی ہیں،ان کے عزائم کو بھانپیں۔

یہ بھی پڑھیں : بلاول بھٹو آج مولانا فضل الرحمٰن سے ملاقات کریں گے

انہوں نے کہا کہ ایک سیاسی نبض شناس عوام کی نبض کو کیوں نہیں سمجھ پا رہا؟ ان کی باہمی نااتفاقی ثبوت ہے کہ یہ اپنے سیاسی مفاد میں صرف مولانا کا کندھا استعمال کرنا چاہتے ہیں۔

فردوس عاشق نے کہا کہ مولانا صاحب! عوام میں آپ کی پذیرائی تب ہی ممکن ہے جب آپ اپنی آواز مظلوم کشمیریوں کے حق میں بلند کریں۔

انہوں نے مزید کہا کہ کشمیر کمیٹی کے چیئرمین کے طور پر پروٹوکول اور مراعات کا قرض ادا کرنے کا وقت آگیا ہے۔ اپنے الفاظ کے تیروں کا رخ فسطائی مودی کی جانب موڑیں۔

مولانا صاحب! دو سیاسی جماعتیں آپ کو اپنے ذاتی مفادات کی بھینٹ چڑھانا چاہتی ہیں،ان کے عزائم کو بھانپیں۔ایک سیاسی نبض شناس عوام کی نبض کو کیوں نہیں سمجھ پا رہا؟ان کی باہمی نااتفاقی ثبوت ہے کہ یہ اپنے سیاسی مفاد میں صرف مولانا کا کندھا استعمال کرنا چاہتے ہیں۔

— Firdous Ashiq Awan (@Dr_FirdousPTI) October 3, 2019

معاون خصوصی نے کہا کہ اپوزیشن سیاسی منافقت کی مثال بن چکی ہے۔ مسلم لیگ ن اور پی پی پی مولانا فضل الرحمن کے ساتھ مسلسل سیاست کر رہی ہیں۔ مولانا کے ذریعے مدارس کے معصوم اور غیر سیاسی بچوں کو سیاسی مفادات کا ایندھن بنانا چاہتے ہیں جو افسوسناک ہے۔

ان کا کہنا تھا کہ دونوں جماعتیں مولانا کے ساتھ کھڑے ہونے کا خطرہ بھی مول نہیں لینا چاہتیں ہیں۔ انہوں نے سوال اٹھایا کہ آپس میں جو سچ نہیں بول سکتے وہ عوام کے ساتھ کیا سچ بولیں گے؟