مقبول خبریں
تبدیلی حکومت کی تبدیل کردہ معشیت، مہنگائی کی شرح 11.4 فیصد تک پہنچ گئی
Adnan Hashmi
03 اکتوبر, 2019 09:15
اسلام آباد: پی ٹی آئی کی تبدیلی حکومت نے مہنگائی کے پہاڑ کھڑے کر دیئے ہیں۔ محکمہ شماریات نے بتایا ہے کہ سالانہ بنیادوں پر ماہ ستمبر میں افراط زر (مہنگائی) کی شرح 11.4 فیصد تک پہنچ گئی۔
رپورٹ کے مطابق کنزیومر پرائس انڈیکس (سی پی آئی) کے ذریعے دیکھے جائے تو محکمہ شماریات کے حساب کتاب کے طریقہ کار میں نظرثانی کے بعد مہنگائی گزشتہ ماہ کے مقابلے میں 0.77 فیصد بڑھی۔
نئے بیس ایئر (16-2015) کی بنیاد پر ستمبر میں افراط زر گزشتہ ماہ کے 10.49 فیصد کے مقابلے میں 11.37 فیصد ہوگئی۔
بیس ایئر میں تبدیلی کا مطلب مالی سال 2016 میں معیشت کی قیمت کی سطح ہے جو اب اس بنیاد پر ہوگی جس کے خلاف سی پی آئی ناپنے کے لیے تمام موجودہ قیمتوں کا حساب کتاب کیا جائے گا۔
اگر مالی سال 2008 کے پرانے بیس ایئر کی طرف جائیں جو 2 ماہ قبل تک استعمال ہورہا تھا تو اہم افراط زر کا انڈیکس ستمبر کے لیے 12.55 فیصد پر آتا ہے جو ظاہر کرتا ہے کہ ماہ اگست کے مہینے کے دوران 0.92 فیصد کا اضافہ دکھاتا ہے۔
تاہم نئے بیس ایئر کے مطابق کم سے کم سی پی آئی جولائی میں 8.4 فیصد ریکارڈ کی گئی جو بڑھتے ہوئے ستمبر میں 11.37 فیصد تک پہنچ گئی۔
یہ بھی پڑھیں : نیب ملکی معشیت کی بہتری کے لیے کام کرنے والوں کے خلاف نہیں : چیئرمین نیب
اس ری بیسنگ سے اگر دوسری طرف نظر ڈالیں تو محکمہ شماریات نے سامان کی ٹوکری میں مختلف استعمال ہونے والی اشیا کے لیے مختص وزن کو بھی تبدیل کردیا اور دیہی اور شہری علاقوں سے حاصل کی جانے والی قیمتوں کا نیا پینل متعارف کروادیا۔
اعداد و شمار کے مطابق شہری سی پی آئی 35 شہروں اور 356 صارفین کی اشیا کو کور کرتا ہے جبکہ دیہی ریکارڈ 27 دیہی مراکز اور 244 اشیا کو کور کرتا ہے۔
واضح رہے کہ بین الاقوامی مانیٹری فنڈ (آئی ایم ایف) نے اندازہ لگایا تھا کہ پاکستان کی افراط زر 13 فیصد تک جاسکتی ہے تاہم حکومت نے اس کا اندازہ تقریباً 11 فیصد تک لگایا تھا جو پہلے ہی گزشتہ ماہ تجاوز کرچکی ہے۔
نئے طریقہ کار کے مطابق ستمبر میں بنیادی افراط زر 8.2 فیصد سے بڑھ کر 8.8 فیصد تھی جبکہ مزید جائزہ لیں تو معلوم ہوتا ہے کہ ستمبر میں شہری علاقوں میں خوراک کی افراط زر سالانہ بنیادوں ہر 15 فیصد تک بڑھ گئی جبکہ ماہانہ بنیاد پر یہ شرح 2 فیصد رہی۔
اس کے علاوہ دیہی علاقوں میں خوراک کی افراط زر سالانہ بنیادوں پر 15 فیصد اور ماہانہ بنیاد پر 1.8 فیصد رہی۔
متعلقہ خبریں
