کراچی سمیت ملک کے بیشتر علاقوں میں بارش کا امکان

اسلام آباد: آئندہ 24 گھنٹوں کے دوران کراچی سمیت ملک کے بیشتر علاقوں میں بارش کا امکان ہے۔

محکمہ موسمیات کے مطابق جمعہ کے روز مظفر آباد سمیت کشمیر، بالائی پنجاب کے اضلاع (راولپنڈی، جہلم، چکوال، ناروال، سیالکوٹ، گجرات، گوجرانوالہ، لاہور، بالائی خیبرپختونخوا  کے اضلاع دیر، سوات،  مانسہرہ، پشاور، ایبٹ آباد ، ہری پور، زیریں سندھ کے اضلاع عمر کوٹ، کراچی، ٹھٹھہ، بدین  اور اسلام آباد میں چند مقامات پر تیز ہواؤں اور گرج چمک کیساتھ بارش کا امکان ہے تاہم ملک کے دیگر علاقوں میں موسم گرم اور مرطوب رہے گا۔

یہ بھی پڑھیں : کراچی: فلڈ وارننگ کے باوجود 500 سے زائد نالوں میں کچرے کے ڈھیر

گزشتہ روز ملک کے بیشتر علاقوں میں موسم گرم اور خشک رہا تاہم کیچ، ابیٹ آباد، گوجرانوالہ، سکھر، شہید بینظیر آباد، حیدر آباد، کراچی کے اضلاع  اور کشمیر میں چند مقامات پر گرج چمک کے ساتھ بارش ہوئی۔

سب سے زیادہ بارش خیبرپختونخوا کے علاقے کاکول میں 17، بلوچستان کے علاقے تربت میں 12، سندھ میں کراچی کے علاقے گلشن حدید میں 06، ناظم آباد میں 03، شہید بینظیر آباد میں 09، حیدرآباد میں 04، سکرنڈ میں 02، آزاد کشمیر کے علاقے کوٹلی میں 04، گڑھی دوپٹہ میں 01، گلگت بلتستان  کے علاقے بگروٹ میں 04، پنجاب کے شہر سیالکوٹ میں 01  ملی میٹر بارش ریکارڈ کی گئی۔

کل ریکارڈ کیے گئے گرم ترین مقامات کے درجہ حرارت، نوکنڈی اور تربت میں 40، میرپورخاص اور سکھر میں 39 ڈگری سینٹی گریڈ ریکارڈ کیا گیا۔

واضح رہے کہ کراچی میں 10 سال بعد پاکستان اور سری لنکا کے درمیان ون ڈے انٹرنیشنل کھیلا جارہا ہے، کراچی کے شائقین میچ کے حوالے سے پرجوش ہیں۔

پاکستان کے سیکورٹی اداروں کی جانب سے تمام حفاظتی اقدامات اٹھالیئے گئے ہیں، اگر میچ کے دوران بھی بارش کا سلسلہ جاری رہتا ہے تو تمام تر تیاریاں اور محنت کے رائیگاں ہو جائیں گی۔