یورو ایشیئن کانفرنس : سلیم مانڈوی والا کی تقریر کے دوران بھارتی وفد کی ہلڑ بازی

اسلام آباد : قازقستان :یورو ایشیئن کانفرنس میں ڈپٹی چیئرمین سینیٹ سینیٹر سلیم مانڈوی والا کی تقریر کے دوران بھارتی وفد کی ہلڑ بازی، تقریر روکنے کی کوشش ناکام ہوگئی۔

قازقستان میں منعقدہ یورو ایشیئن کانفرنس میں ڈپٹی چیئرمین سینیٹ سینیٹر سلیم مانڈوی والا کی تقریر کے دوران بھارتی وفد نے ہلڑ بازی بازی کی۔ مقبوضہ کشمیر میں بھارتی مظالم اجاگر کرنے پر بھارتی وفد نے تقریر روکنے کی کوشش کی جو ناکام ہوگئی۔

سینیٹر سلیم مانڈوی والا نے کشمیر میں بھارتی مظالم کے خلاف قرار داد پیش کردی۔

ڈپٹی چیئرمین سینیٹ نے کہا کہ یورو ایشیئن کانفرنس کے شرکاء بھارتی مظالم کی بھر پور مذمت کرتے ہیں۔ کشمیر سمیت دیگر ممالک میں انسانی حقوق کی خلاف ورزیاں قابل مذمت ہیں۔ ظلم اور جبر کے ذریعے انسانوں کی مرضی کو دبایا نہیں جاسکتا ہے۔

یہ بھی پڑھیں : ایشائی پارلیمانی کانفرنس : پاکستان کا بھارتی جارحیت بے نقاب کرنے پر انڈین وفد آگ بگولہ

سلیم مانڈوی والا نے کہا کہ انسانی حقوق کی خلاف ورزیاں اقوام متحدہ کے منشور کے خلاف ہیں۔ یورو ایشیئن کانفرنس کے شرکاء کشمیر، فلسطین اور میانمار میں مظالم کا نوٹس لیں۔ کشمیر سمیت ہر جگہ طاقت کے استعمال کو مسترد کرتے ہیں۔

ڈپٹی چیئرمین سینیٹ سینیٹر سلیم مانڈوی والا نے کہا کہ خود مختاری کشمیری عوام کا جمہوری حق ہے، جس کی حمایت کرتے ہیں۔ دنیا بھر میں غیر جمہوری قوتیں عوام کو ڈرا دھمکا کر مذاکرات کے راستے بند کررہی ہیں۔ کشمیر اقوام متحدہ کا نامکمل ایجنڈا ہے۔

انہوں نے کہا کہ مسئلہ کشمیر بین الاقوامی برادری کے لیے ٹیسٹ کیس ہے، کشمیر میں انسانی حقوق کی خلاف ورزیوں پر آواز اٹھانے والے ممالک کے شکر گزار ہیں۔

ڈپٹی چیئرمین سینیٹ نے کہا کہ ترکی ایران یو اے ای اور دیگر ممالک نے کشمیر میں مظالم کی مذمت کی ہے۔ بین الاقوامی تنظیموں نے بھی مقبوضہ کشمیر میں بھارتی مظالم کے خلاف آواز بلند کی ہے۔