وزیر اعظم مؤثر اور باوقار انداز سے کشمیریوں کا مقدمہ پیش کر رہے ہیں : فردوس عاشق

اسلام آباد: فردوس عاشق اعوان نے کہا ہے کہ وزیراعظم عمران خان مؤثر اور باوقار انداز سے مظلوم کشمیریوں کا مقدمہ اقوام عالم کے سامنے پیش کر رہے ہیں۔

وزیر اعظم کی معاون خصوصی ڈاکٹر فردوس عاشق اعوان نے سماجی میڈیا پر جاری اپنے بیان میں کہا ہے کہ وزیراعظم عمران خان مؤثر اور باوقار انداز سے مظلوم کشمیریوں کا مقدمہ اقوام عالم کے سامنے پیش کر رہے ہیں۔ مختلف ممالک کےسربراہان سے ملاقاتوں کا محور تنازعہ کشمیر اور اس کی موجودہ سنگین صورتحال تھی۔

انہوں نے کہا کہ 80 لاکھ کشمیری مقبوضہ وادی میں محصور ہیں۔ عمران خان نے دنیا کو باور کرایا کہ مقبوضہ جموں کشمیر میں انسانی بحران جنم لے سکتا ہے، جس سے امن عالم کو شدید خطرات لاحق ہیں۔

یہ بھی پڑھیں : وزیر اعظم عمران خان کا دورہ امریکا، مشن کشمیر ہے : ملیحہ لودھی

فردوس عاشق نے کہا کہ وادی جنت نظیر میں مظلوم عوام پر زندگی تنگ، گلیاں ویران اور کوچہ و بازار سنسان پڑے ہیں۔ امریکی صدر ڈونلڈ ٹرمپ سے ملاقات میں وزیراعظم نے  مقبوضہ جموں کشمیر میں کرفیو ختم کرانے پر زور دیا۔

معاون خصوصی نے کہا کہ صدر ٹرمپ کا بیان”وزیراعظم عمران خان اور پاکستان پر اعتماد ہے”اور خطے میں قیام امن کیلئے ایران سے بات کرنے کا مینڈیٹ عمران خان کی قائدانہ صلاحیتوں اور دنیا کے پاکستان پر بڑھتے ہوئے اعتماد کا اعتراف ہے۔

ان کہا کہنا تھا کہ وزیراعظم نے دیگر ممالک کے سربراہان، برطانیہ کے وزیراعظم بورس جانسن، ترکی کے صدر طیب اردگان، ایران کے صدر حسن روحانی اور سوئٹزرلینڈ کے صدر اولی میور سے ملاقاتوں میں دوطرفہ تعلقات کی مضبوطی، باہمی تعاون کے فروغ کی اہمیت پر زور دیا اور مقبوضہ کشمیر میں انسانی حقوق کی خلاف ورزیوں سے آگاہ کیا۔

انہوں نے بتایا کہ عمران خان نے دنیا پر واضح کیا کہ علاقائی امن و سلامتی کے لئے مسئلہ کشمیر کا حل ناگزیر ہے۔