پاک فوج نے بھارتی آرمی چیف کے الزام کو جعلی فلیگ آپریشن کے لیے بہانہ قرار دے دیا

روالپنڈی : پاک فوج نے بھارتی آرمی چیف کے دعوؤں کو بے بنیاد قرار دیتے ہوئے دراندازی کے ان الزامات کو بھارت کی جانب سے جعلی فلیگ آپریشن کے لیے بہانہ قرار دے دیا ہے۔

پاک فوج کے شعبہ تعلقات عامہ (آئی ایس پی آر) کے ڈائریکٹر جنرل (ڈی جی) میجر جنرل آصف غفور نے سماجی رابطے کی ویب سائٹ ٹوئٹر پر لکھا کہ بھارتی فوج کے کمانڈرز کی جانب سے خاص طور آزاد جموں و کشمیر سے متعلق غیرذمہ دارانہ بیانات مقبوضہ کشمیر میں صورتحال قابو کرنے میں ناکامی پر اپنی مایوسی کا اظہار ہے۔

یہ بھی پڑھیں : پاکستان نے بھارتی آرمی چیف کا الزام مسترد کردیا

ترجمان پاک فوج نے کہا کہ بھارتی کمانڈرز کے یہ بیانات مقبوضہ جموں و کشمیر میں بھارتی ریاستی دہشت گردی اور قبضے سے دنیا کی توجہ ہٹانے کی کوششیں ہیں۔

Irresponsible statements by Indian military commanders particularly about AJ&K are expression of their frustration due to their failure to handle situation in IOJ&K and attempts to divert world’s attention from Indian state terrorism and siege of IOJ&K.

— DG ISPR (@OfficialDGISPR) September 24, 2019

ایک اور ٹوئٹ میں میجر جنرل آصف غفور نے کہا کہ بھارت کے دراندازی یا مبینہ دہشت گرد کمپس کی موجودگی کے الزامات جعلی آپریشن/ مس ایڈونچر کے لیے بہانہ ہیں جس کی اگر کوشش کی گئی تو علاقائی امن کے لیے سنگین نتائج برآمد ہوں گے۔

Accusations of infiltration/presence of alleged terrorists camps are pretext for a false flag operation/misadventure which if tried shall have serious consequences for regional peace.Pak Armed Forces are fully prepared to respond to any aggression/misadventure regardless of cost.

— DG ISPR (@OfficialDGISPR) September 24, 2019

پاک فوج نے بھارت کو واضح کیا کہ ‘پاکستان کی مسلح فورسز کسی بھی جارحیت/مس ایڈوینچر کا ہرقیمت پر جواب دینے کے لیے مکمل تیار ہے’۔

اس سے قبل پاکستانی دفترِ خارجہ نے بھی بھارتی آرمی چیف کے بیان کو مسترد کرتے ہوئے کہا ہے کہ بالاکوٹ میں شدت پسندوں کا کوئی کیمپ موجود نہیں ہے، بھارت عالمی برادری کی توجہ کشمیر کی صورتحال سے ہٹانا چاہتا ہے۔