حکومت کو گھر بھیجنے کے خواب دیکھنے والے احمقوں کی جنت میں رہتے ہیں، ہمایوں اختر خان

لاہور: پاکستان تحریک انصاف کے رہنما ہمایوں اخترخان کا کہنا ہے کہ وزیراعظم عمران خان کی کرپشن کے خلاف زیرو ٹالرنس کی پالیسی ہے اور اس پرہر صورت عملدرآمد کیا جائے گا۔

تفصیلات کے مطابق تحریک انصاف کے رہنما ہمایوں اخترخان نے کہا کہ حکومت کو گھر بھیجنے کے خواب دیکھنے والے احمقوں کی جنت میں رہتے ہیں۔

انہوں نے کہا کہ عوام ذاتی مفادات کے لیے حکومت کو غیرمستحکم کرنے کی سازش کرنے والوں کا ساتھ دینے کی بجائے ان کا محاسبہ کریں گے۔

ہمایوں اختر خان نے کہا کہ سابقہ حکمران ملک کی لوٹی ہوئی دولت واپس کر دیں اس کے بعد ہمیں ان سے کوئی سروکار نہیں ہے۔

تحریک انصاف کے رہنما نے کہا کہ موجودہ حکومت کا کرپشن کا ایک بھی اسکینڈل سامنے نہیں آیا جبکہ ماضی میں ایک سال کے دورا ن کرپشن کی ہوشربا کہانیاں زبان زد عام ہوتی تھیں۔

انہوں نے کہا کہ وزیراعظم عمران خان کی کرپشن کے خلاف زیرو ٹالرنس کی پالیسی ہے اور اس پرہر صورت عملدرآمد کیا جائے گا کیونکہ عوام نے پاکستان تحریک انصاف کو کرپشن کو جڑ سے اکھاڑ پھینکنے کا مینڈیٹ دیا ہے۔

ہمایوں اختر خان نے کہا کہ سابقہ حکمران ملک کی لوٹی ہوئی دولت واپس کردیں کیونکہ اس کے بغیر جان چھوٹنے کا سوال ہی پیدا نہیں ہوتا۔