پاک فوج کے 5 لیفٹیننٹ جنرلز کی مختلف عہدوں پر تقرریاں

راولپنڈی: پاک فوج کے شعبہ تعلقات عامہ (آئی ایس پی آر) کے مطابق پاک فوج میں بڑے عہدوں پر تقرریاں اور تبادلے کیے گئے ہیں۔

یہ بھی پڑھیں : آئی ایس پی آر نے بھارتی فوج کا پاکستانی شہری پکڑنے کے جھوٹ کا پردہ چاک کردیا

آئی ایس پی آر کی جانب سے جاری بیان کے مطابق جن 5 لیفٹیننٹ جنرل کی مختلف عہدوں پر تقرریاں کی گئی، ان میں لیفٹیننٹ جنرل وسیم اشرف، لیفٹیننٹ جنرل اظہر عباس، لیفٹیننٹ جنرل خالد ضیا، لیفٹیننٹ جنرل محمد چراغ حیدر اور لیفٹیننٹ جنرل بلال اکبر شامل ہیں۔

بیان کے مطابق لیفٹیننٹ جنرل وسیم اشرف کو کمانڈر سدرن کمانڈ کے عہدے پر ترقی دی گئی، جبکہ لیفٹیننٹ جنرل اظہر عباس اب کمانڈر راولپنڈی کور کی حیثیت سے خدمات انجام دیں گے۔

اسی طرح لیفٹیننٹ جنرل خالد ضیا کو انسپکٹر جنرل آرمز کا عہدہ سونپ دیا گیا ہے، جبکہ لیفٹیننٹ جنرل محمد چراغ حیدر کا ڈائریکٹر جنرل جے ایس ایچ کیو کے عہدے پر تقرر کیا گیا ہے۔

پاک فوج کے شعبہ تعلقات عامہ کے مطابق لیفٹیننٹ جنرل بلال اکبر کو چیئرمین پی او ایف کے منصب پر فائز کیا گیا ہے۔

یاد رہے کہ گزشتہ روز پاک فوج کی جانب سے 4 میجر جنرل کو ترقی دے کر لیفٹیننٹ جنرل بنا دیا گیا تھا۔

آرمی چیف کا میڈیکل کمپلیکس کا دورہ

دوسری جانب چیف آف آرمی اسٹاف جنرل قمر جاوید باجوہ نے ایبٹ آباد میں آرمی میڈیکل کمپلیکس کا دورہ کیا اور یادگار شہدا پر حاضری دے کر فاتحہ خوانی کی۔

آئی ایس پی آر کے مطابق آرمی چیف نے دورے کے دوران لیفٹیننٹ جنرل خاور رحمٰن کو آرمی میڈیکل کمپلیکس کے کرنل کمانڈر کے عہدے پر تعینات کیا۔

اس موقع پر سابق کرنل کمانڈنٹ لیفٹیننٹ جنرل زاہد حامد، ریٹائرڈ اور سینئر افسران کے ساتھ ساتھ آرمی میڈیکل کور کے سپاہیوں کی بڑی تعداد بھی موجود تھی۔

شعبہ تعلقات عامہ نے بتایا کہ آرمی چیف نے کمانڈنگ افسران اور سپاہیوں سے خطاب کرتے ہوئے دہشت گردی کے خلاف جنگ میں قیمتی جانیں بچانے پر آرمی میڈیکل کمپلیکس کے کردار کو سراہا۔

جنرل قمر جاوید باجوہ نے پاک فوج کے ساتھ ساتھ عام شہریوں کو بہترین طبی سہولیات کی فراہمی پر ڈاکٹرز اور پیرامیڈکس کی خدمات اور کردار کو بھی سراہا۔