ایل این جی ریفرنس : شاہد خاقان عباسی اور مفتاح اسماعیل کے جسمانی ریمانڈ میں 26 ستمبر تک توسیع

اسلام آباد : احتساب عدالت نے ایل این جی کیس میں گرفتار سابق وزیراعظم شاہد خاقان عباسی اور مفتاح اسماعیل کے جسمانی ریمانڈ میں 26 ستمبر تک توسیع کردی۔

یہ بھی پڑھیں : تمام ارکان کے پروڈکشن آرڈرز جاری کئے جائیں، شاہد خاقان کا اسپیکر کو کھلا خط

احتساب عدالت میں ایل این جی کیس کی سماعت ہوئی، نیب کی جانب سے سابق وزیراعظم شاہدخاقان عباسی کو جج محمد بشیر کی عدالت میں پیش کیا گیا۔

یہ بھی پڑھیں : شاہد خاقان عباسی نے چیئرمین نیب کی تقرری پر قوم سے معافی مانگ لی

دوران سماعت نیب کی جانب سے شاہد خاقان عباسی کے مزید 14 روزہ ریمانڈ کی استدعا کی گئی۔

شاہد خاقان عباسی خود روسٹرم پر آئے اور کہا کہ کل جو چیف جسٹس نے کہا بات ساری وہی ہے، یہ سارے سیاسی کیس ہیں، مجھے خدشہ ہے یہ مجھ پر جعلی کیس بنادیں گے، ان کو بے شک ایک ہی بار 90 دن کا ریمانڈ دے دیں، بات وہی ہے جو میں نے پہلے دن کردی تھی۔

یہ بھی پڑھیں : آئیں چلیں سب مظفرآباد، بن کر کشمیریوں کی آواز

ایل این جی کیس میں سابق وزیر خزانہ مفتاح اسماعیل اور سابق ایم ڈی پی ایس او شیخ عمران الحق کو بھی احتساب عدالت کے جج محمد بشیر کے رو برو پیش کیا گیا اور دونوں ملزمان کے جسمانی ریمانڈ میں توسیع کی استدعا کی گئی۔

نیب پراسیکیوٹر نے کہا مزید تفتیش کرنی ہے، جسمانی ریمانڈ میں توسیع کی جائے ، جس پر وکیل صفائی کا کہنا تھا کہ ہمارا اس کیس سے کوئی تعلق نہیں ہے، مفتاح اسماعیل کو 23 گھنٹے اکیلے رکھا جاتا ہے، کم از کم انہیں کھانا تو خاقان عباسی کے ساتھ کھانے دیا جائے۔

وکیل صفائی کی جانب سے نیب کے جسمانی ریمانڈ میں استدعا کی مخالفت کی گئی۔

ایل این جی کیس کے تفتیشی افسر ملک زبیر نے عدالت میں بیان میں کہا میں کراچی گیا تھا، سارا ریکاڑد خود لیکر آیا ہوں، ریکارڈ، شواہد کی روشنی میں مزید تفتیش کرنا چاہتا ہوں۔

عدالت نے تینوں ملزموں کے جسمانی ریمانڈ میں 26 ستمبر تک توسیع کرتے ہوئے مزید 14 دن کے لئے نیب کے حوالے کردیا، ملزمان میں شاہد خاقان عباسی، مفتاح اسماعیل، شیخ عمران الحق شامل ہیں۔