پاکستان کو ناقابل تسخیر بنانے کیلیے یکجہتی کی فضا کو بڑھانا ہے: فردوس عاشق

اسلام آباد : ڈاکٹر فردوس عاشق اعوان نے کہا ہے کہ پاکستان کو ناقابل تسخیر قوت بنانے کے لیےاتحاد اور یکجہتی کی فضا کو آگے لے کر بڑھنا ہے۔

سماجی رابطوں کی ویب سائٹ پر اپنی ٹوئٹ میں معاون خصوصی برائے اطلاعات و نشریات فردوس عاشق اعوان نے کہا کہ یوم فضائیہ ہمیں اپنے شاہینوں کی بہادری اور جانبازی یاد دلاتا ہے، جنہوں نے کئی گنا بڑے دشمن کو جذبہ ایمانی سے مار بھگایا۔

یہ بھی پڑھیں : غیر قانونی الاٹمنٹ ریفرنس : سماعت 5 اکتوبر تک ملتوی، کیس بھونڈا مذاق ہے : مصطفیٰ کمال

انہوں نے کہا کہ راشد منہاس اور ایم ایم عالم دنیا میں پاک فضائیہ کی جرآت کی علامت ہیں۔ پوری قوم اپنے قابل فخر شاہینوں کو سلام پیش کرتی ہے۔

فردوس عاشق اعوان نے کہا کہ قوم نے جس ولولے، اتحاد اور جذبے سے یومِ دفاع بہادر کشمیریوں کے ساتھ یکجہتی کے طور پر منایا، وہ بےمثال ہے۔ شہدا اور غازیوں کو خراجِ عقیدت پیش کرتے ہوئے قوم کی اخوت کا متاثر کن جذبہ دیکھنے میں آیا۔ ان کا کہنا تھا کہ شہدا اور غازیوں نے جنگ ستمبر میں جرات اور شجاعت کی ولولہ انگیز تاریخ رقم کی۔

یوم فضائیہ ہمیں اپنے شاہینوں کی بہادری اور جانبازی یاد دلاتا ہے جنہوں نے کئی گنا بڑے دشمن کو جذبہ ایمانی سے مار بھگایا۔راشد منہاس اور ایم ایم عالم دنیا میں پاک فضائیہ کی جرآت کی علامت ہیں۔ پوری قوم اپنے قابل فخر شاہینوں کو سلام پیش کرتی ہے۔

— Firdous Ashiq Awan (@Dr_FirdousPTI) September 7, 2019

معاون خصوصی نے کہا کہ جموں کشمیر کے عوام کے جائز قانونی حق کی حمایت اور سچے جذبوں کے اظہار پر پاکستانیوں کو سلام پیش کرتے ہیں۔ یہ جذبے زندہ قوموں کی علامت اور شان ہوتے ہیں۔ پاکستان کو ناقابل تسخیر قوت بنانے کے لئے ہم نے اتحاد اور یکجہتی کی اسی فضاء کو آگے لیکر بڑھنا ہے۔