کیا بابر اعظم ریٹائرمنٹ لے رہے ہیں؟

سوشل میڈیا کسی بھی وقت آپ کو ہیرو سے زیرو قرار دے سکتا ہے اور آج کل قومی کرکٹر بابراعظم کچھ اس طرح کا تجربہ کر رہے ہیں۔

ایک زمانے میں قومی کرکٹ ٹیم کے پوسٹر بوائے بابر اعظم کو گزشتہ ایک سال کے دوران تمام فارمیٹس میں طویل عرصے سے خراب فارم کی وجہ سے مسلسل تنقید کا سامنا کرنا پڑ رہا ہے۔

ٹرولز، توہین آمیز میمز اور ناپسندیدہ عرفی ناموں کی بھرمار اس حد تک بڑھ گئی ہے کہ ان کے بارے میں جعلی ریٹائرمنٹ پوسٹس آن لائن گردش کر رہی ہیں۔

بنگلہ دیش کے خلاف ایک اور مایوس کن کارکردگی کے بعد، جہاں انہوں نے راولپنڈی میں دوسرے ٹیسٹ میں صرف 31 اور 11 رنز بنائے، بابر اعظم کے لئے ریٹائرمنٹ کے جعلی اعلانات سوشل میڈیا پلیٹ فارم ایکس پر وائرل ہوگئے۔

پہلی جعلی پوسٹ پیر کی سہ پہر منظر عام پر آئی جس میں بڑی چالاکی سے حقیقی ریٹائرمنٹ کے اعلان کی زبان کی نقل کی گئی جو ممکنہ طور پر سب سے زیادہ وقف مداحوں کو بھی گمراہ کر رہی تھی۔

یہ بھی پڑھیں: سابق چیف سلیکٹر نے بابراعظم کو ضدی قرار دے دیا

جیسے ہی اس پوسٹ نے توجہ حاصل کی دو گھنٹے بعد ایک اور پوسٹ نمودار ہوئی جس نے ریٹائرمنٹ کی افواہ کو مزید ہوا دی۔

بنگلہ دیش کے خلاف جاری سیریز میں بابر اعظم کی خراب کارکردگی برقرار ہے اور انہوں نے چار اننگز میں صرف 64 رنز بنائے ہیں۔

ان چیلنجز کے باوجود بابر اعظم انگلینڈ کے خلاف پاکستان کی آئندہ سیریز میں اپنی فارم دوبارہ حاصل کرنے کے لیے پرعزم ہیں۔