اسرائیل کے لبنان پر فضائی حملے جاری؛ مزید 105 افراد شہید

لبنان کی مزاحمتی تحریک حزب اللہ کے سربراہ حسن نصر اللہ کی شہادت کے بعد بھی اسرائیل کے فضائی حملے جاری ہیں، جس کے نیتجے میں مزید 105 افراد شہید ہوگئے۔

میڈیا رپورٹس کے مطابق گزشتہ 24 گھنٹوں کے دوران لبنان کی وادی بقاع اور عین الدلب سمیت دیگر علاقوں میں اسرائیلی بمباری سے مزید 105 افراد شہید جبکہ درجنوں زخمی ہوچکے ہیں۔

اسرائیلی فضائیہ نے غزہ کے بعد بیروت میں رہائشی عمارتوں کو نشانہ بنایا جس کے نتیجے میں معصوم شہریوں کی جانوں کو نقصان پہنچا۔

مزید پڑھیں: حزب اللہ کے سربراہ حسن نصر اللہ کو کیسے ٹارگٹ کیا گیا، اہم تفصیلات جاری

دوسری جانب اسرائیلی فوج کی جانب سے حزب اللہ کے 120 مقامات کونشانہ بنانے کا دعویٰ کیا ہے۔

اسرائیلی فوج کی جانب سے بھاری جنگی ہتھیاروں اور گاڑیوں کے ہمراہ لبنان کی سرحد کی طرف پیش قدمی جاری ہے جس سے لبنان پر زمینی حملے کے خدشات گہرے ہوتے جا رہے ہیں۔