پاک انگلینڈ سیریز؛ ٹکٹوں کی قیمت کیا ہوگی؟

پاکستان اور انگلینڈ کے درمیان ٹیسٹ سیریز کیلئے ٹکٹوں کی فروخت کا اعلان ہوگیا۔

شائقین کی سہولت کے لیے فزیکل ٹکٹ 4 اکتوبر سے صبح 9 بجے کے بعد مختلف آؤٹ لیٹس سے خریدنے کے لیے دستیاب ہوں گے، شائقین کی بڑی تعداد میں آنے کی ترغیب دینے کیلئے ملتان میں دونوں ٹیسٹ میچوں کے پہلے دن جنرل انکلوژرز کا داخلہ مفت ہوگا۔

اسی طرح راولپنڈی ٹیسٹ کے پہلے دن کیلئے پریمیم انکلوژرز میں داخلہ بھی مفت ہوگا، یہ سیریز آئی سی سی ورلڈ ٹیسٹ چیمپیئن شپ کا حصہ ہے جس کا پہلا اور دوسرا ٹیسٹ میچ 7 سے 19 اکتوبر تک ملتان کرکٹ اسٹیڈیم میں کھیلا جائے گا۔ تیسرا ٹیسٹ میچ 24 سے 28 اکتوبر تک راولپنڈی کرکٹ اسٹیڈیم میں کھیلا جائے گا۔

مزید پڑھیں: ٹیسٹ سیریز کیلئے انگلش ٹیم پاکستان کب آئے گی؟

پہلے ٹیسٹ کے لیے منگل سے جمعرات یعنی دوسرے سے چوتھے روز تک جنرل انکلوژر کے ٹکٹوں کی قیمت 50 روپے ہوگی جبکہ شائقین حنیف محمد اور مشتاق احمد انکلوژرز کے ٹکٹ پانچویں اور آخری روز 100 روپے میں خرید سکتے ہیں۔

مزید پڑھیں: "لگتا ہے پاکستانی کرکٹرز نے دودھ پینا بند کردیا ہے”

فرسٹ کلاس انکلوژرز (وسیم اکرم اور الٰہی برادرز) کے لیے ٹکٹ پہلے ٹیسٹ کے چار دنوں کے لیے 100 روپے میں دستیاب ہوں گے جبکہ پانچویں دن شائقین کے لیے ٹکٹ کی قیمت 200 روپے ہوگی۔

اسی طرح پریمیئم انکلوژرز (جاوید میانداد اور ظہیر عباس) کے لیے ٹکٹ پیر سے جمعرات یعنی پہلے سے چوتھے روز تک 200 روپے میں ٹکٹ دستیاب ہوں گے۔

شائقین اسی انکلوژرز سے پانچویں دن کا کھیل 300 روپے میں دیکھ سکتے ہیں۔