ٹِک ٹاکر بہن پر قاتلانہ حملہ کرنیوالا بھائی ائیرپورٹ سے گرفتار

ٹِک ٹاکر بہن کو غیرت کے نام پر قاتلانہ حملہ کرنے کے بعد بیرون ملک فرار ہونے والا بھائی گرفتار ہوگیا۔

پنجاب پولیس کے اسپیشل آپریشنز سیل نے بروقت کارروائی کرتے ہوئے مشہور ٹِک ٹاکر ثمینہ پر غیرت کے نام پر قاتلانہ حملہ کرنے والے ملزم کی بیرون ملک فرار کی کوشش ناکام بنا دی اور ایف آئی اے کی مدد سے ملزم کو ائرپورٹ سے گرفتار کرلیا گیا۔

ترجمان پنجاب پولیس کے مطابق ملزم سلطان احمد مدعیہ کا حقیقی بھائی ہے۔

مزید پڑھیں: شاداب کو شادی کی پیشکش کی تھی؟ ٹِک ٹاکر کا انکشاف

ملزم سیالکوٹ ائیرپورٹ سے عمان فرار ہونے کی کوشش کر رہا تھا جب کہ پنجاب پولیس نے پی این آئی ایل میں ملزم کے کوائف شامل کروا رکھے تھے، جسے ایف آئی اے کی مدد سے فلائٹ میں سوار ہونے سے قبل گرفتار کرلیا۔

ملزم سلطان احمد نے گزشتہ ماہ قلعہ دیدار سنگھ کے علاقے میں ٹک ٹاکر ثمینہ پر قاتلانہ حملہ کیا تھا۔ واقعے کی ایف آئی آر تھانہ قلعہ دیدار سنگھ میں درج ہے۔