بطور فوجی، ہم عید کے موقع پر گھروں سے دور ڈیوٹی پر فخر کرتے ہیں، آرمی چیف

آرمی چیف جنرل سید عاصم منیر کا کہنا ہے کہ بطور فوجی ہم گھر اور پیاروں سے دورعید منانے پر فخر محسوس کرتے ہیں۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے آج لائن آف کنٹرول پر حاجی پیر سیکٹر کا دورہ کیا جہاں انہوں نے فرنٹ لائن پر افسروں اور جوانوں کے ساتھ عید کی نماز ادا کی۔

آئی ایس پی آر کے مطابق جنرل عاصم منیر نے پاکستان کی سلامتی کے لیے دعا کی اور پاکستان کے شہداء کی قربانیوں کو خراج عقیدت پیش کیا جب کہ اس دوران سپہ سالار نے جوانوں کے بلند حوصلے اور عزم کو بھی سراہا۔

انٹر سروسز پبلک ریلیشنز کے مطابق آرمی چیف نے کشمیریوں پر بھارت کے جاری ظلم و ستم کی مذمت کی اور مقبوضہ کشمیر میں عوام کی آزادی کی جدوجہد پر گفتگو کی، ان کا کہنا تھا کہ بھارت کشمیری عوام کونشانہ بنانے کی کوشش کر رہا ہے۔

یہ بھی پڑھیں: 

وطن کیلئے جان قربان کرنے سے بڑھ کر کوئی شے عظیم نہیں، آرمی چیف

شیخ رشید کا آرمی چیف سے عید پر عام معافی دینے کا مطالبہ

آرمی چیف کا کہنا تھا کہ جعلی فلیگ آپریشنز بھارت کا معمول کا سیاسی آلہ بن چکے ہیں، انتخابات کے بعد بھارت پاکستان کے خلاف پروپیگنڈے کی کوشش کررہا ہے۔

جنرل عاصم منیر نے کہا کہ پاکستان نے ہمیشہ خطے میں امن و استحکام کی حمایت کی ہے تاہم اشتعال انگیزی، علاقائی خود مختاری کی خلاف ورزی کا فوری جواب دیا جائے گا۔