جرمنی کی اینجلیک کربر نے ٹائٹل جیت لیا، سرینا ولیمز کو شکست

لندن : تیسرا گرینڈ سلیم ٹینس ٹورنامنٹ ومبلڈن کی ویمنز چیمپیئن شپ جرمن کھلاڑی انجلیک کیربر نے جیت لیا، امریکہ کی سرینا ولیمز کو شکست کا سامنا کرنا پڑا۔

تفصیلات کے مطابق لندن میں کھیلے جانے والے تیسرے گرینڈ سلیم ٹینس ٹورنامنٹ ومبلڈن کی ویمنز چیمپیئن شپ میں جرمنی کی کھلاڑی اینجلیک کربر نے ایک آسان مقابلے کے بعد امریکا کی سرینا ولیمز کو ہرا دیا۔

اینجلیک کربرکی جیت کااسکور3-6 اور 3-6 رہا، کیربر پہلی مرتبہ ومبلڈن ویمن چیمپیئن شپ جیتنے میں کامیاب رہی ہیں۔ قبل ازیں سن 2016 میں وہ آسٹریلین اوپن اور یُو ایس اوپن بھی جیت چکی ہیں۔

امریکی ٹینس اسٹار سرینا ولیمز بچی کی ولادت کی وجہ سے ٹینس سے دور رہیں اور اس ٹورنامنٹ میں اُن کی عالمی رینکنگ پچیسویں تھی۔

قبل ازیں سربیا کے ٹینس اسٹار نوواک جوکووچ نے ٹینس گرینڈ سلیم ٹورنامنٹ ومبلڈن کے فائنل میچ کے لیے کوالیفائی کر لیا۔ جوکووچ نے دوسرے سیمی فائنل میں ہسپانوی کھلاڑی رافیل نڈال کو پانچ سیٹ سے شکست دی، ومبلڈن مینز سنگلز کافائنل آج نواک جوکووچ اور کیون اینڈرسن کے درمیان کھیلا جائے گا۔