اتوار، 9-فروری،2025
اتوار 1446/08/10هـ (09-02-2025م)

چیمپیئنز ٹرافی کیلئے قومی اسکواڈ کا اعلان، کئی پرانے کھلاڑیوں کی واپسی

31 جنوری, 2025 18:38

پاکستان کرکٹ بورڈ  (پی سی بی) نے آئی سی سی چیمپئنز ٹرافی 2025 کے لیے 15 رکنی اسکواڈ کا اعلان کر دیا۔

چیمپئنز ٹرافی پاکستان میں 19 فروری سے 9 مارچ تک منعقد ہوگی۔

پی سی بی کے پاس اسکواڈ میں تبدیلی کے لیے  11 فروری تک کا وقت ہے اس کے بعد  تبدیلی کی اجازت صرف طبی بنیادوں پر آئی سی سی ایونٹ ٹیکنیکل کمیٹی کی منظوری سے ہوگی۔

یہی ٹیم چیمپئنز ٹرافی سے قبل کراچی اور لاہور میں  ہونے والی  سہ فریقی ون ڈے سیریز میں بھی حصہ لے گی جس میں نیوزی لینڈ اور جنوبی افریقہ شامل ہیں۔

15 کھلاڑیوں پر مشتمل اسکواڈ میں چار تبدیلیاں کی گئی ہیں جنہوں نے آخری بار گزشتہ سال جنوبی افریقا میں ون ڈے سیریز کھیلی تھی۔

عبداللہ شفیق، محمد عرفان خان، صائم ایوب اور سفیان مقیم کی جگہ فہیم اشرف، فخرزمان، خوشدل شاہ اور سعود شکیل کو ٹیم میں شامل کیا گیا ہے۔

پاکستان کا 15 رکنی اسکواڈ

بیٹرز : بابر اعظم، فخر زمان، کامران غلام، سعود شکیل، طیب طاہر

آل راؤنڈرز:  فہیم اشرف ، خوشدل شاہ ، سلمان علی آغا (نائب کپتان )

وکٹ کیپر بیٹرز : محمد رضوان (کپتان)، عثمان خان

اسپنر: ابرار احمد

فاسٹ بولرز: حارث رؤف، محمد حسنین، نسیم شاہ،  شاہین شاہ آفریدی

2017  کی آئی سی سی چیمپئنز ٹرافی کے فائنل میں بھارت کے خلاف سنچری اسکور کرنے والے فخر زمان نے اسکواڈ میں کم بیک کیا ہے، وہ جون 2024 سے بیماری اور انجری کی وجہ سے انٹرنیشنل کرکٹ سے دور تھے۔

پاکستان کے ٹیسٹ نائب کپتان سعود شکیل کو ہوم ٹیسٹ میچوں میں مسلسل اور شاندار پرفارمنس کا صلہ  ٹیم میں شمولیت کی صورت میں ملا ہے۔

بائیں ہاتھ کے بیٹر نے آئی سی سی  ورلڈ کپ 2023 میں کولکتہ میں انگلینڈ کے خلاف اپنا 15 واں اور آخری ون ڈے کھیلا تھا۔

آل راؤنڈر فہیم اشرف  اور خوشدل شاہ کی 50 اوورز کے اسکواڈ میں واپسی سے کپتان محمد رضوان کو اضافی آپشنز  فراہم کیے گئے ہیں۔

فہیم اشرف نے اپنا 34 واں اور آخری ون ڈے انٹرنیشنل ستمبر 2023 میں کھیلا تھا جس کے بعد سے وہ ڈومیسٹک کرکٹ کے تینوں فارمیٹس میں چند مستقل مزاج پرفارمرز میں ایک رہے ہیں۔

جب کہ خوشدل نے آخری بار اگست 2022 میں ون ڈے میں پاکستان کی نمائندگی کی تھی۔

قومی اسکواڈ  میں 2017 چیمپئنز ٹرافی کا ٹائٹل جیتنے والی ٹیم کے تین کھلاڑی بشمول بابر اعظم، فہیم اشرف اور  فخر زمان شامل ہیں۔

Leave a Comment

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Scroll to Top