اتوار، 9-فروری،2025
اتوار 1446/08/10هـ (09-02-2025م)

بھارتی یوم جمہوریہ کیخلاف کشمیریوں کا یوم سیاہ، برسلز میں بڑا مظاہرہ

26 جنوری, 2025 09:00

بھارتی یوم جمہوریہ کے خلاف دنیا بھر میں کشمیری یوم سیاہ منارہے ہیں، کشمیر کونسل یورپ نے برسلز میں بھارتی سفارتخانے کے سامنے مظاہرہ کیا۔

جی ٹی وی کے مطابق مظاہرے میں کشمیر کونسل یورپ کو دیگر تنظیموں کا تعاون بھی حاصل تھا، متعدد کشمیری اور ان کے ہمدرد شریک ہوئے۔ مظاہرین نے کشمیری پرچم اور بینرز اٹھارکھے تھے جن پرکشمیریوں کے حق میں اوربھارتی مظالم کے خلاف نعرے درج تھے۔

مظاہرین نے مطالبہ کیا کہ بھارت کشمیریوں پر مظالم بندکرے اورکشمیریوں کو انکا حق خودارادیت دینے کے لئے اپنے وعددوں پر عمل کرے۔

اپنے خطاب میں چیئرمین کشمیر کونسل ای یو نے مطالبہ کیا کہ مقبوضہ کشمیرمیں انسانی حقوق کی خلاف ورزیوں کو روکاجائے اور کشمیریوں کو ان کاحق دیاجائے تاکہ مسئلہ کشمیر منصفانہ طور پر حل کیا جاسکے۔

یاد رہے کہ بھارتی یوم جمہوریہ کو مقبوضہ کشمیر، آزاد کشمیر اور پوری دنیا میں رہنے والے کشمیری ہر سال یوم سیاہ کے طور پر مناتے ہیں۔

علی رضاسید نے کہا کہ کشمیریوں کو ان کے حقوق ملنے چاہیں، ان پر ناانصافیاں ختم ہونی چاہیں اور مسئلہ کشمیر بلاتاخیر پرامن طور پر حل کیا جانا چاہیے تاکہ کشمیری پرامن اور خوشحال زندگی بسر کرسکیں۔

علی رضا سید نے اپنے خطاب میں کہاکہ بھارت کشمیریوں کے خلاف سنگین جرائم میں ملوث ہے، انہوں نے پابند سلاسل اہم سیاسی، سماجی اور صحافتی کشمیری شخصیات کا تذکرہ کیا اور کہا کہ بڑی تعداد میں کشمیری بے جرم و خطا قید ہیں، اور انہیں کالے قوانین کے تحت پابند سلاسل بنایاگیا ہے اور ان پر بے بنیاد مقدمات قائم کئے گئے ہیں۔

چیئرمین کشمیرکونسل ای یو علی رضاسید نے کہا کہ کشمیری قوم اپنے حق خودارادیت سے کبھی بھی دستبردارنہیں ہوگی اور اس حق پر کبھی بھی سودابازی نہیں کرے گی۔

مظاہرے کے دوران دیگر مقررین نے کہاکہ بھار ت کے یوم جمہوریہ کے موقع پراحتجاج کامقصد یہ ہے کہ ہم پوری دنیا کو یہ پیغام دینا چاہتے ہیں کہ بھارت طویل عرصے سے غیرقانونی طور پر جموں و کشمیر کے ایک بڑے حصے پر قابض ہے اور کشمیریوں کے جمہوری اور انسانی حقوق پامال کررہا ہے۔

انہوں نے کہا کہ کشمیر میں ٹارگٹ کلنگ، ماورائے عدالت قتل اور تشدد اور خواتین کی بے حرمتی کی وارداتیں جاری ہے۔ مظاہرے کے شرکاء نے عالمی برادری سے مطالبہ کیا کہ وہ مقبوضہ کشمیر میں مظالم بند کروائے اور مسئلہ کشمیر کے پرامن اور منصفانہ حل کے لیے اپنا بھرپور کردار ادا کرے۔

Leave a Comment

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Scroll to Top