مقبول خبریں
سپریم کورٹ کے ایڈیشنل رجسٹرار جوڈیشل عہدے سے فارغ

سپریم کورٹ کے ایڈیشنل رجسٹرار جوڈیشل نذر عباس کو عہدے سے برطرف کردیا گیا۔
اعلامیے کے مطابق ایڈیشنل رجسٹرار جوڈیشل نذر عباس سنگین غلطی کے مرتکب ہوئے، رجسٹرار سپریم کورٹ کو معاملہ دیکھنے کی ہدایت کی گئی۔
سپریم کورٹ کے اعلامیے میں کہا گیا ہے کہ ایڈیشنل رجسٹرار جوڈیشل نے آئینی بینچ کا مقدمہ غلطی سے ریگولر بینچ کےسامنے سماعت کے لیے مقرر کیا جس کے باعث سپریم کورٹ اور فریقین کے وقت اور وسائل کا ضیاع ہوا۔
آج جسٹس منصور علی شاہ اور جسٹس عقیل عباسی نے ایڈیشنل رجسٹرار جوڈیشل کے خلاف توہین عدالت کارروائی کی سماعت کی۔
ایڈیشنل رجسٹرار کی بیماری کی رخصت کے باعث رجسٹرار سپریم کورٹ عدالت میں پیش ہوئے جنہوں نے یقین دہانی کروائی کہ معزز بینچ کے سامنے مقدمات ڈی لسٹ کرنے میں کوئی بدنیتی شامل نہیں تھی۔
دوران سماعت رجسٹرار نے عدالت کو بتایا کہ ایڈیشنل رجسٹرار جوڈیشل کا اقدام ریگولر بینچز کمیٹی کے احکامات کی روشنی میں تھا۔
قبل ازیں سپریم کورٹ میں جسٹس منصور علی شاہ کی سربراہی میں دو رکنی بینچ نے بینچز کے اختیارات کا کیس مقرر نہ کرنے پر توہین عدالت کیس کی سماعت کی۔
عدالت عظمیٰ نے رجسٹرار سپریم کورٹ سے استفسار کیا کہ بتائیں عدالتی حکم کے باوجود کیس سماعت کے لیے مقرر کیوں نہ ہوا؟ جب کہ عدالت نے وکلا منیر اے ملک اور حامد خان کو عدالتی معاون مقرر کیا اور اٹارنی جنرل پاکستان کو بھی معاونت کی ہدایت کی۔