مقبول خبریں
سیف علی خان کی ہیلتھ انشورنس پالیسی کی دستاویزات منظر عام پر

بالی ووڈ ادکار سیف علی خان کی ہیلتھ انشورنس پالیسی کی دستاویزات منظر عام پر آگئیں۔
میڈیا رپورٹس کے مطابق ممبئی میں اپنے فلیٹ میں حملے کے بعد سیف علی خان اب تیزی سے صحت یاب ہورہے ہیں، اداکار کی حالت خطرے سے باہر ہے اور انہیں ممبئی کے لیلاوتی اسپتال کے وارڈ میں منتقل کردیا گیا ہے۔
انڈیا ٹوڈے کی رپورٹ کے مطابق اسپتال کے علاج کے اخراجات سے متعلق ان کا ایک ہیلتھ انشورنس کلیم انٹرنیٹ پر گردش کر رہا ہے، دستاویز کے مطابق اداکار نے اپنے علاج کیلئے 35 لاکھ 95 ہزار روپے کا دعویٰ کیا ہے جس میں سے 25 لاکھ روپے انشورنس کمپنی نے منظور کرلیے ہیں۔
اس کے علاوہ دستاویز میں حساس معلومات جیسے پیشنٹ آئی ڈی، کمرے کی کیٹیگری اور متوقع ڈسچارج تاریخ بھی ظاہر کی گئی ہیں۔
بھارتی میڈیا کے مطابق سیف علی خان "نیوا بپا ہیلتھ انشورنس” کے پالیسی ہولڈر ہیں۔ کمپنی نے اداکار کے کلیم کی ابتدائی رقم کےلیے منظوری دی ہے لیکن اداکار کو دی گئی رقم کی صحیح تفصیلات نہیں بتائیں۔
بیمہ کمپنی نیوا بپا ہیلتھ انشورنس کے آفیشل بیان میں کہا گیا ‘اداکار سیف علی خان کے ساتھ پیش آنے والا حالیہ واقعہ انتہائی افسوسناک ہے، ہم ان کی جلد اور مکمل صحت یابی کی دعا کرتے ہیں’۔
بیان میں مزید کہا گیا ‘مسٹر خان ہمارے پالیسی ہولڈر ہیں، اسپتال میں داخلے کے وقت ہمیں کیش لیس پری آتھرائزیشن کی درخواست موصول ہوئی، اور ہم نے ابتدائی علاج کے لیے رقم کی منظوری دے دی، علاج مکمل ہونے کے بعد حتمی بلز موصول ہونے پر انہیں پالیسی کی شرائط و ضوابط کے مطابق سیٹل کیا جائے گا۔ ہم اس مشکل وقت میں مسٹر خان اور ان کے خاندان کے ساتھ کھڑے ہیں’۔
خیال رہے کہ 16 جنوری کی رات میں سیف علی خان پر ان کے گھر میں مبینہ چور نے چھری کے پے درپے وار کرکے انہیں زخمی کر دیا تھا، اداکار کو فوری طور پر ممبئی کے لیلاوتی اسپتال منتقل کیا گیا جہاں ان کا علاج جاری ہے اور ان کی حالت اب خطرے سے باہر بتائی جارہی ہے۔