غزہ جنگ بندی؛ فلسطینیوں کی مزاحمت کاروں کیساتھ جشن کی تصاویر وائرل

غزہ میں 15 ماہ سے جاری اسرائیلی جارحیت کے خاتمےاور جنگ بندی کے آغاز کے بعد فلسطینی مزاحمت کاروں نے غزہ کی سڑکوں پر گشت کیا جہاں شہریوں نے ان کا والہانہ استقبال کیا۔

میڈیا رپورٹس کے مطابق اسرائیل کیساتھ 15 ماہ سے جاری غزہ جنگ بندی کے بعد کی تصاویر اور ویڈیوز نے قابض صہیونی ریاست کے غرور کو خاک میں ملا کر رکھ دیا۔

فلسطینی کے باسیوں نے مزاحمت کی علامت سمجھی جانے والی تنظیم حماس کے کمانڈرز کیساتھ شہر میں جشن منایا اور اسرائیل شکست کا مذاق اڑاتے رہے۔

فلسطینی مزاحمت کاروں نے غزہ کے علاقوں دیر البلاح اور خان یونس کی سڑکوں پر گشت کیا، اس موقع پر شہریوں نے نعرے لگاکر اور ہاتھ ہلا کر اپنے غازیوں کا استقبال کیا۔

غزہ میں کئی گھنٹوں کی تاخیر کے بعد بالآخر جنگ بندی کا آغاز ہوگیا ہے، پاکستانی وقت کے مطابق صبح ساڑھے 11 بجے معاہدے پر عمل درآمد شروع ہونا تھا جو تقریباً 4 گھنٹے تاخیر کا شکار ہوا۔

مقامی میڈیا کے مطابق ہزاروں فلسطینی پولیس افسران مختلف علاقوں میں تعینات کردیے گئے ہیں، میونسپلٹی نے گلیوں کو دوبارہ کھولنےاور بحالی کا کام شروع کر دیا ہے۔

واضح رہے کہ غزہ پر 15 ماہ سے مسلط اسرائیلی جنگ میں فلسطینی محکمہ صحت کے مطابق ہزاروں بچوں اور خواتین سمیت 47 ہزار 899 فلسطینی شہید ہوئے جب کہ جبکہ محتاط اندازے کے مطابق شہداء کی تعداد تقریبا 64 ہزار سے زائد ہے۔