آئی ایم ایف نے بجلی بلوں میں ریلیف دینے کی حکومتی تجویز مسترد کردی

اسلام آباد: عالمی مالیاتی ادارے (آئی ایم ایف) نے پاکستانی عوام کو بجلی بلوں میں ریلیف دینے کی حکومتی تجویز مسترد کر دی۔

 وفاقی حکومت نے سیلز ٹیکس میں کمی پر آئی ایم ایف سے رائے مانگی تھی تاہم آئی ایم ایف نے بلوں میں سیلز ٹیکس میں کمی کی حکومتی تجویز کو مسترد کرتے ہوئے عوام کو سستی بجلی فراہم کرنے کا خواب چکنا چور کر دیا۔

عالمی مالیاتی فنڈ کا کہنا ہے کہ قرض پروگرام کے تحت نئے ٹیکسز سے چھوٹ نہیں دی جا سکتی، سیلز ٹیکس چھوٹ سے ٹیکس اہداف کا حصول ممکن نہیں رہے گا۔

مزید پڑھیں:پاکستان ٹیکس نہ دینے والے شعبے سے آمدنی حاصل کرے، آئی ایم ایف کا مطالبہ

وزیراعظم شہباز شریف نے گزشتہ روز کراچی میں پاکستان اسٹاک ایکسچینج کی تقریب سے خطاب میں کہا تھا کہ ٹیکس سلیبس کاروبار اور سرمایہ کاری کو چلنے نہیں دے رہے مگر آئی ایم ایف سے کیے وعدے نبھانے پڑینگے، وقت آنے پر آئی ایم ایف کو ٹاٹا، بائے بائے کہہ دیں گے۔

ان کا کہنا تھا شرح سود 13 فیصد پر آگئی ہے، وہ چاہتے ہیں کہ یہ 6 فیصد پر آجائے مگر فیصلے تمام امکانات کا جائزہ لے کر ہی کیے جاسکتے ہیں۔

وزیراعظم نے تاجروں کو جلد ملاقات کی دعوت دیتے ہوئے کہا حقیت پسندانہ جائزہ لیناہوگا کہ کہاں بہتری ہے اور کہاں خرابیاں ہیں؟ یہ سمجھنے والے احمقوں کی جنت میں رہتے ہیں کہ ہر چیز ٹھیک ہے۔

خیال رہے کہ وفاقی حکومت کی جانب سے بجلی 10 روپے فی یونٹ سستی کرنے کی اطلاعات سامنے آئی تھیں جس پر وزیراعظم شہباز شریف کا کہنا تھا کہ بجلی سستی کرنے کے معاملے پر آئی ایم ایف سے بات کی جائے گی۔