بھارتی فورسز کی قرآن مجید کی بےحرمتی کی ناپاک جسارت

مقبوضہ کشمیر میں بھارتی قابض سیکیورٹی فورسز کے اہلکاروں نے سری نگر سینٹرل جیل میں قرآن مجید کی بےحرمتی کی ناپاک جسارت کرڈالی۔

کشمیر میڈیا سروس کے مطابق سری نگر سینٹرل جیل میں چھاپہ مار کارروائی کی آڑ میں قرآن مجید کی بے حرمتی کی، جس کے باعث قیدوں اور عوام میں شدید غم و غصے کی لہر دوڑ گئی۔

عینی شاہدین نے اس منظر کو دل دہلا دینے والا حال سناتے ہوئے بتایا کہ قرآن پاک کو بھارتی فورسز نے جان بوجھ کر بیرکوں میں پھینکا۔

سری نگر جیل کے قیدیوں نے بھارتی فورسز کی اس ناپاک جسارت پر شدید احتجاج کرتے ہوئے کہا کہ قابض فورسز کا یہ عمل اشتعال انگیز اور توہین آمیز ہے۔

کشمیری رہنماؤں نے قرآن پاک کی بے حرمتی کے ذمہ دار چھاپہ مار سیکیورٹی اہلکاروں کے ارکان پر لگایا اور انہیں فوری گرفتار کرکے سخت سزا دینے کا مطالبہ کیا۔

مذہبی رہنماؤں کا اپنے بیان میں کہنا تھا کہ قرآن پاک کی بے حرمتی سے قیدیوں سمیت تمام مسلمانوں کے دل غمزدہ ہیں۔

انسانی حقوق کی تنظیموں نے بھی قرآن کی بے حرمتی کی شدید مذمت کرتے ہوئے اسے کشمیری شناخت اور مذہبی عقائد کے خلاف بھارتی قابض حکومت کی انسانی اور مذہبی حقوق کی خلاف ورزی قرار دیا۔