طالبعلم نے پرچے میں پاس ہونے کیلئے مُنفرد پیشکش کر ڈالی

کراچی: چیئرمین انٹرمیڈیٹ بورڈ نے انکشاف کیا ہے کہ ایک طالبعلم نے کاپی میں ہزار کا نوٹ رکھ کر لکھا کہ مجھے پاس کردیں۔

کراچی میں میڈیا سے گفتگو کرتے ہوئے چیئرمین انٹرمیڈیٹ بورڈ شرف علی شاہ نے کہا ہے کہ انٹر بورڈ امتحانات میں کئی طالب علم ایسے بھی تھے جنہوں نے اپنی امتحانی کاپیوں میں گانے، کہانیاں اور صرف سوال نامہ لکھا تھا۔

چیئرمین انٹرمیڈیٹ بورڈ نے بتایا کہ کسی بچے نے کاپی میں ہزار روپے کا نوٹ رکھا اورلکھا میری گنجائش اتنی ہی ہے پلیز مجھے پاس کریں۔

مزید پڑھیں:انٹرمیڈیٹ امتحانات میں ناکام ہونے والے طلبا کیلئے خوشخبری

انکا کہنا تھا کہ چارج لیتے ہی نتائج کی تحقیقات سے متعلق ایک کمیٹی بنائی جس میں مضامین کے ماہرین  اور ایک پرنسپل کو کمیٹی کا کنوینر بنایا ہے۔ انہوں نے کہا کہ بچوں کے ساتھ نا انصافی نہیں ہونے دیں گے۔

انکا مزید کہنا تھا کہ شکایتی سیل قائم کردیا ہے تاکہ کسی کو کوئی مشکل نہ ہو جب کہ تحقیقات کے لیے ہیڈ ایگزیمنر کی میٹنگ بھی بلائی تھی، ایگزیمنر نے بتایا کہ کچھ بچوں نے کاپیوں میں کہانی، گانے اور سوالنامہ ہی تحریر کیا ہوا ہے۔

خیال رہے کہ انٹرمیڈیٹ بورڈ کراچی کے تحت گیارہویں جماعت کے نتائج کے آنے کے بعد سے طلبہ و والدین سمیت سیاسی جماعتیں بھی تحفظات کا اظہار کررہی تھیں جبکہ بورڈ نے تحفظات کا اظہار کرنے پر طلبہ کیلئے اسکروٹنی فیس 50 فیصد کم کردی ہے۔