ضلع کُرم؛ مندوری میں مُظاہرین کا دھرنا جاری، خوراک سے لدی 25 گاڑیاں واپس روانہ

ضلع کُرم کے علاقے پارا چنار کی اہم شاہراہ ٹل نہ کھلنے کے باعث خوراک سے لدی 25 گاڑیاں واپس اپنے علاقوں کو روانہ ہوگئیں۔

ہنگو کی ضلعی انتظامیہ کے مطابق لوئر کرم کے علاقے بگن کے قریب مندوری میں احتجاجی دھرنے اور سڑکوں کی بندش کے باعث ٹل سے قافلے کی روانگی ممکن نہیں، لہٰذا اشیاء خورونوش خراب ہونے کے خدشے پر گاڑیاں واپس چلی گئیں ہیں، تاہم نان فوڈ آئٹم کے ٹرک موجود ہیں۔

ادھر کچھ روز قبل ڈپٹی کمشنر جاوید محسود پر فائرنگ کے واقعے کے بعد کرم کیلئے 3 ماہ بعد کھانے پینے کا سامان لے جانے والا قافلہ روک دیا گیا تھا۔

مزید پڑھیں:ضلع کُرم پاراچنار کی اہم شاہراہ 3 ماہ بعد بھی نہ کُھل سکی

دوسری جانب کمشنر کوہاٹ اور ڈی سی کُرم کے دھرنا مظاہرین سے مذاکرات جاری ہیں۔ مندوری میں دھرنا دینے والے مظاہرین کا مطالبہ ہے کہ نومبر میں ہنگامہ آرائی کرنے والوں کے خلاف مقدمات درج کیے جائیں اور  نقصانات کا ازالہ کیا جائے۔

خیال رہے کہ  4 جنوری کو لوئر کرم کے علاقے بگن میں نامعلوم شرپسندوں کی فائرنگ سے ڈی سی کرم جاوید محسود سمیت 7 افراد زخمی ہوگئے تھے۔