کراچی میں سردی کی شدت مزید بڑھ گئی

شہر قائد میں سردی کی شدت میں اضافہ ہوگیا جس کے باعث کم سے کم درجہ حرارت 9.8 ڈگری سینٹی گریڈ ریکارڈ ہوا۔

محکمہ موسمیات نے کراچی کے موسم کے حوالے سے پیش گوئی کرتے ہوئے کہا ہے کہ شہر میں معمول سے تیز سرد ہوائیں چل سکتی ہیں، کراچی میں آئندہ 24 گھنٹوں کے دوران موسم سرد اور خشک رہے گا جبکہ زیادہ سے زیادہ درجہ حرارت 28 جبکہ کم سے کم 9 ڈگری سینٹی گریڈ متوقع ہے۔

محکمہ موسمیات نے مزید کہا کہ  کراچی  میں تیز ہواؤ کے سبب دھند بھی ہوگا، 5 سے 20 کلومیٹر فی گھنٹہ کی رفتار سے شمال مشرقی سمت سے ہوائیں چلنے کا امکان ہے۔

مزید پڑھیں:پاکستان کے مختلف شہروں میں موسم کیسا رہے گا؟

محکمہ موسمیات کے مطابق اگلے چندروز کے دوران شہرمیں موسم خشک اور راتیں سرد رہنے کا امکان ہے۔ وسطی اور بالائی سندھ کے اضلاع میں صبح کے وقت دھند چھاسکتی ہے

خیال رہے کہ کراچی میں رواں موسمِ سرما کی سرد ترین رات ریکارڈ ہوئی تھی جس کے سبب کم سے کم درجہ حرارت 8 ڈگری سینٹی گریڈ ریکارڈ کیا گیا تھا۔

واضح رہے کہ گزشتہ دو دنوں سے کراچی میں دن کے وقت تیز دھوپ کے باعث گرمی جیسا ماحول بن جاتا تھا، آج شام سے تیز ہوائیں چلنے لگیں ہیں۔

بلوچستان کی یخ بستہ ہواؤں کے باعث کراچی میں سردی کی لہر برقرار ہے جبکہ آئندہ 24 گھنٹوں کے دوران موسم سرد اور خشک رہے گا۔ محکمہ موسمیات کے مطابق 28 دسمبر کو کراچی کا کم سے کم درجہ حرارت 8.5 ڈگری سینٹی گریڈ ریکارڈ ہوا تھا۔