فلم ‘پشپا 2’ کے سپُر اسٹار الو ارجن گرفتار

ساؤتھ انڈین فلم انڈسٹری کے معروف سُپر اسٹار الو ارجن کو پولیس نے گرفتار کرلیا۔

4 دسمبر کو  حیدرآباد کے سندھیا تھیٹر میں فلم ’ پشپا 2 ‘ کے پریمیئر میں بھگدڑ مچنے سے ایک خاتون ہلاک  جب کہ ان کے دو بیٹے زخمی ہوئے جن کی حالت تشویشناک ہے۔

بھارتی میڈیا کے مطابق الو ارجن کو اس بھگدڑ مچنے کے افسوسناک واقعے پر گرفتار کیا، پولیس اہلکاروں نے آج صبح اداکار کو ان کی رہائشگاہ سے گرفتار کیا جس کے بعد انہیں تھانے منتقل کردیا گیا۔

بھارتی میڈیا پر الو ارجن کی گرفتاری کے وقت کی تصاویر بھی شیئر کی گئی ہیں۔

الو ارجن سمیت ان کی سکیورٹی ٹیم اور سندھیا تھیٹر کی انتظامیہ کے خلاف قتل و تشدد کا مقدمہ درج کیا گیا ہے۔

ایف آئی آر کے متن میں کہا گیا ہے کہ تلنگانہ پولیس کو اس بات کی ا طلاع نہیں دی گئی کہ الو ارجن اسکریننگ کے لیے سندھیا تھیٹر آنے والے تھے جب کہ تھیٹر انتظامیہ اس آمد سے آگاہ تھی۔

مقدمے میں مزید کہا گیا کہ اگر پولیس کو علم ہوتا تو مزید سکیورٹی فراہم کی جاتی تاہم تھیٹر میں پہنچنے والے بڑے ہجوم اور سکیورٹی کی کمی کی وجہ سے یہ بھگدڑ مچی جس کے باعث جانی نقصان ہوا۔