وزیراعظم کے مشیر رانا ثنا اللہ کے ناقابل ضمانت وارنٹ گرفتاری جاری

وزیراعظم کے مشیر برائے سیاسی امور اور رہنما ن لیگ رانا ثنا اللہ کے ناقابل ضمانت وارنٹ گرفتاری جاری کیے گئے ہیں۔

گوجرانوالہ کی جوڈیشل مجسٹریٹ سدرہ گل نواز نے رانا ثنا اللہ کے وارنٹ گرفتاری جاری کرتے ہوئے انہیں گرفتار کر کے 12 دسمبر کو عدالت میں پیش کرنے کا حکم  دے دیا۔

رانا ثنا اللہ کے خلاف گوجرانولہ کے تھانہ سیٹلائٹ ٹاؤن میں درج مقدمہ عدالت میں زیر سماعت ہے، مقدمہ 16 اکتوبر 2020 کو پی ڈی ایم جلسے کے روز درج کیا گیا تھا۔

مقدمے میں کنٹینر ہٹانے اور پولیس اہلکاروں پر گاڑی چڑھانے کا الزام ہے، اسی ایف آئی آر میں سابق وفاقی وزیر خرم دستگیر، عمران خالد اور سلمان خالد بٹ کو پہلے ہی بری کردیا گیا تھا۔

رپورٹ کے مطابق پولیس نے رانا ثنا اللہ سے متعلق مقدمے کا چالان بھی تاخیر سے جمع کرایا تھا اور انہیں بے گناہ قرار دیتے ہوئے 173 کی رپورٹ عدالت میں جمع کرائی تھی۔

تاہم عدالت نے پولیس رپورٹ کو مسترد کرکے وزیراعظم کے مشیر کو ذاتی حیثیت میں طلب کیا مگر مسلسل غیر حاضری کے بعد جوڈیشل مجسٹریٹ نے رانا ثنا اللہ کے ناقابل ضمانت وارنٹ گرفتاری جاری کیے۔