قطر نے ٹرمپ کی غزہ جنگ بندی کی کوششوں پر دوبارہ ثالثی کا کردار شروع کر دیا

واشنگٹن: امریکہ کے نومنتخب صدر ڈونلڈ ٹرمپ نے غزہ میں جنگ بندی کے لیے سفارتی کوششیں شروع کر دی ہیں۔

خبر رساں ادارے کے مطابق مشرق وسطیٰ کے لیے ٹرمپ کے نامزد نمائندہ اسٹیو وٹکوف نے غزہ جنگ کے معاملے پر نومبر میں قطر اور اسرائیل کے وزرائے اعظم سے ملاقات کی تھی۔

بیان میں کہا گیا ہے کہ امریکہ کی جانب سے یہ اشارہ ملا ہے کہ اس ملاقات کے نتیجے میں قطر نے اپنا ثالثی کا کردار دوبارہ شروع کر دیا ہے۔ اس بات کا امکان ہے کہ حماس کے مذاکرات کار دوحہ واپس جائیں گے تاکہ مذاکرات کے ایک نئے دور میں سہولت فراہم کی جا سکے۔

مزید پڑھیں:ٹوکیو اولمپکس؛ فلسطین کی حمایت پر الجیرین کھلاڑی کو باہر کردیا گیا

بعد ازاں قطر کی وزارت خارجہ کے ترجمان ماجد الانصاری نے ایک بیان میں کہا کہ دوحہ میں فلسطینی تنظیم حماس کا سیاسی دفتر مستقل طور پر بند نہیں کیا گیا ہے، بیان میں مزید کہا گیا کہ حماس کا دفتر غزہ جنگ کے خاتمے کیلئے ثالثی کی کوششوں کو آسان بنانے کیلئے قائم کیا گیا تھا۔

قطری ترجمان کا کہنا تھا کہ دوحہ میں حماس کے دفتر کی مستقل بندش سے متعلق کسی بھی فیصلے سے براہ راست ہم آگاہ کریں گے اور یہ میڈیا کی قیاس آرائیوں کا حصہ نہیں ہونا چاہیے۔

واضح رہے کہ نومبر 2024 کے آغاز میں برطانوی خبر رساں ادارے کی ایک رپورٹ میں ایک امریکی عہدیدار کے حوالے سے کہا گیا تھا کہ امریکا نے قطر سے مطالبہ کیا ہے کہ وہ حماس کی قیادت کو ملک بدر کرے۔ انہوں نے امریکی مطالبے سے بھی آگاہ کیا۔