ایتھوپیا اور پاکستان کاہوا بازی کے شعبہ میں تعاون بڑھانے پر اتفاق

ایتھوپیا اور پاکستان نے ہوابازی کے شعبہ میں تعاون کو وسعت دیتے ہوئے دوطرفہ تعلقات کو مضبوط بنانے پر اتفاق کرلیا۔

ایتھوپیا کے پاکستان میں سفیر ڈاکٹر جمال بکر عبداللہ اور وفاقی سیکریٹری ایوی ایشن احسن علی منگی کے درمیان ملاقات کے دوران ہوا، انہوں نے باہمی مفادات کے معاملات پر تفصیلی گفتگو کی، جس میں دونوں ممالک کے درمیان فضائی روابط میں اضافہ کرنے اور علم و ٹیکنالوجی کی منتقلی کے لیے باہمی تعاون شامل ہے۔

ملاقات کے دوران، ڈاکٹر جمال نے کراچی میں ایتھوپین ایئر لائنز کے آپریشن شروع کرنے میں پاکستان کی حکومت کی جانب سے تعاون پر شکریہ ادا کیا۔

انہوں نے پاکستان کے دیگر شہروں میں ایتھوپین ایئرلائنز کا آغاز کرنے کی اہمیت پر زور دیا تاکہ نہ صرف ایتھوپیا اور پاکستان کے درمیان بلکہ افریقہ اور پاکستان کے درمیان بھی روابط میں اضافہ ہو سکے۔

سفیر نے وفاقی سیکریٹری کو پاکستان کی لک افریقہ اور انگیج افریقہ پالیسیوں کے مؤثر نفاذ کیلئے ایتھوپین ایئرلائنز کی اہم کردار کے بارے میں آگاہ کیا، جس کا مقصد پاکستان اور افریقی ممالک کے درمیان تعلقات کو مضبوط بنانا ہے۔

اس موقع پر وفاقی سیکریٹری ایوی ایشن احسن علی منگی نے افریقہ کو پاکستان کے قریب لانے میں ایتھوپین ایئرلائنز کی اہم کردار کو تسلیم کیا اور سفیر کو ایوی ایشن سیکٹر میں باہمی تعاون کو آگے بڑھانے میں اپنے ادارے کی حمایت کا یقین دلایا۔