پی ٹی آئی احتجاج کے باعث ملکی معیشت کو کتنے ارب کا نقصان ہوا؟

حکومتی ذرائع کے مطابق پاکستان تحریک انصاف (پی ٹی آئی) کی قیادت میں حالیہ مظاہروں کے نتیجے میں پاکستان کی معیشت کو 600 ارب روپے سے زائد کا نقصان ہوا ہے۔

ان نقصانات میں یومیہ 190 ارب روپے سے زائد کے معاشی نقصانات شامل ہیں، جس میں امن و امان کو برقرار رکھنے کے لئے اضافی اخراجات اور عوامی املاک کو نقصان شامل ہے۔

صرف تین روز میں جی ڈی پی کو 432 ارب روپے کا براہ راست نقصان ہوا جب کہ ٹیکس محصولات میں 78 ارب روپے کی کمی واقع ہوئی۔

ذرائع کا کہنا ہے کہ اسلام آباد میں افراتفری سے صرف برآمدی شعبے کو 50 ارب روپے کا نقصان اٹھانا پڑا اور اسی عرصے کے دوران براہ راست غیر ملکی سرمایہ کاری (ایف ڈی آئی) میں 10 ارب روپے کی کمی ریکارڈ کی گئی۔

یہ بھی پڑھیں: علی امین گنڈا پور اور بشریٰ بی بی کے فرار ہونے کے بعد احتجاج منسوخ

احتجاج کے نتیجے میں موٹرویز، میٹرو سروسز اور اسلام آباد کے کاروباری مرکز بلیو ایریا کو بھی بند کرنا پڑا جس کے نتیجے میں سرکاری خزانے اور تاجروں کو بھاری نقصان اٹھانا پڑا۔

زراعت، صنعتی اور خدمات کے شعبوں کو کافی رکاوٹوں کا سامنا کرنا پڑا، بہت سے کاروبار بجلی کی بندش اور سیکیورٹی خدشات کی وجہ سے بند ہونے پر مجبور ہوئے۔

انٹرنیٹ خدمات کی بندش سے آئی ٹی اور ٹیلی کام کے شعبوں کو شدید دھچکا لگا ہے جس کی وجہ سے متعدد بین الاقوامی اور گھریلو آرڈرز منسوخ کیے گئے۔