پی ٹی آئی نے احتجاج کی حکمت عملی کی منظوری دیدی

پشاور: پاکستان تحریک انصاف (پی ٹی آئی) نے متفقہ طور پر آج کا احتجاج منصوبہ بندی کے مطابق منعقد کرنے کا فیصلہ کرلیا ہے۔

تفصیلات کے مطابق پی ٹی آئی رہنماؤں نے وزیراعلیٰ خیبر پختونخوا ہاؤس میں اعلیٰ سطح کا اجلاس منعقد کیا اور احتجاج کی حکمت عملی کو حتمی شکل دیتے ہوئے کہا گیا کہ اسے نہ تو ملتوی کیا جائے گا اور نہ ہی اپنے مقاصد کے حصول سے قبل اسے ختم کیا جائے گا۔

ذرائع کا کہنا ہے کہ موجودہ صورتحال کو مدنظر رکھتے ہوئے آج کے مارچ کے حوالے سے حکمت عملی تیار کرلی گئی ہے۔ پارٹی چیئرمین بیرسٹر گوہر کے ذریعے وفاقی حکومت کو آگاہ کر دیا گیا ہے کہ احتجاج ملتوی نہیں کیا جائے گا۔

مزید پڑھیں:کسی دھرنے یا ریلی کی اجازت نہیں دے سکتے،  وزیر داخلہ نے چیئرمین پی ٹی آئی پر واضح کردیا

اجلاس میں اس بات پر اتفاق کیا گیا کہ تحریک انصاف کے بانی کی ہدایت پر مذاکرات کے دروازے کھلے رہیں گے اور احتجاجی مظاہرہ رہنما کی رہائی کے بعد ہی اختتام پذیر ہوگا۔

پی ٹی آئی قیادت نے کارکنوں کو ہدایت کی کہ وہ ہر قیمت پر ڈی چوک تک پہنچنے کو یقینی بنائیں۔ گرفتاریوں سے بچنے کے لیے کارکنوں، رہنماؤں اور قانون سازوں کو الگ الگ سفر کرنے کا مشورہ دیا گیا ہے۔

دوسری جانب وزیراعلیٰ خیبرپختونخوا علی امین گنڈاپور سہ پہر 3 بجے تک صوابی پہنچیں گے جبکہ دیگر قافلوں کو بھی اسی وقت جمع ہونے کی ہدایت کی گئی ہے، کارکنوں کو وائرلیس مواصلاتی آلات اور دیگر ضروری اشیاء لانے کی بھی ہدایت کی گئی ہے۔