دشمن عناصر کے مذموم عزائم ناکام بنانا ہماری اولین ترجیح ہے، آرمی چیف

آرمی چیف جنرل سید عاصم منیر نے کہا ہے کہ دشمن عناصر کے مذموم عزائم کو ناکام بنانا ہماری اولین ترجیح ہے۔

پاک فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف جنرل عاصم منیر نے پشاور کا دورہ کیا جہاں انہیں سکیورٹی صورتحال اور خطے میں جاری انسداد دہشت گردی آپریشنز کی پیشرفت پر بریفنگ دی گئی۔

آئی ایس پی آر کے مطابق آرمی چیف کے دورہ پشاور کے موقع ہر وزیراعلیٰ خیبر پختونخوا علی امین گنڈا پور اور فیلڈ کمانڈرز بھی موجود تھے۔

انٹر سروسز پبلک ریلیشنز کے مطابق شہدا اور غازیوں کو خراج تحسین پیش کرتے ہوئے آرمی چیف نے مادر وطن کے دفاع کے لیے دی جانے والی بے مثال قربانیوں پر زور دیا۔

جنرل عاصم نے ریمارکس دیئے کہ یہ قربانیاں مسلح افواج اور قانون نافذ کرنے والے اداروں کی قومی لچک، متاثر کن اور غیر متزلزل لگن کی بنیاد ہیں۔

آرمی چیف نے ہر قسم کے خطرات کا مؤثر طریقے سے مقابلہ کرنے کے لیے فوجیوں کے بلند حوصلے، آپریشنل تیاری اور غیرمتزلزل عزم کو بھی سراہا۔

آئی ایس پی آر کے مطابق جنرل عاصم منیر نے دشمن نیٹ ورکس کو ختم کرنے اور قومی سلامتی کو نقصان پہنچانے والے غیر قانونی اسپیکٹرم کو ختم کرنے کے لیے فوج کے پختہ عزم کا اعادہ کیا۔